Agriculture (Research and Education) chuan sorkar leh mipuite tana an hnathawhte puanzarna tura an siam “Mizoram Agriculture Research Newsletter” Edition hmasa ber (January-June 2012) chu Pu C.Lalniliana, Agri Director (R&E) kaihhruaiin Parliamentary Secretary Pu K.S. Thanga’n a office chamber-ah a tlangzarh.

Pu K.S. Thanga chuan he Newsletter-a article zawng zawng hi Agriculture Department (R&E)-in Mizoram leilung ngeia Research uluk taka an neih hnu a ziah a nih avangin a rintlak a ni, a ti. Duhthusamah chuan Mizorama kuthnathawktute zawng zawngin hlawhtlinna nasa zawk an neih theih nan he Newsletter hi dawng thei theuh tura hmalak ni thei se a duhawm hle ang, a ti bawk.

He Newsletter-ah hian Agriculture Directorate (R&E) enkawl KVK 7 ten an kutkawiha, kuthnathawktute tan thiam thil an enchhina an hlawhtlinnate tarlan a ni a, a hlu hle tura ngaih a ni. Newsletter hi kum 1 a vawi 2 tihchhuah thin tura ruahman a ni a, Mizo tawnga ziak a ni.