Vawiin chawhma dar 11 khan Pu Lianzuala MLA chuan Chhiahtlangah cheng nuaih kua senga sak BNRGSK Building thar a hawng.

He hunah hian bialtu MLA leh Mizoram KVI Board Chairman ni bawk, Pu K. Lianzuala chuan Mizoram sawrkarin he Bial leh khawtlang tana hmasawnna hna chi hrang hrang a thawh te tarlangin, mipuite chu kum 10 kalta a sawrkar hmasa in hna alo thawh tawh leh tun kum 4 chhunga Congress sawrkar in a thawhte khaikhin thin tura chahin, tun sawrkarin kum 4 chhunga he bial leh khawtlang tana hna a thawh hrang hrang a taka hmuh tur a awm zel chu lawmawm a tih thu a sawi a, heng malsawmna an dawn hrang hrangte hi sorkar an tawiawmna avanga dawng thin an nih thu pawh sawiin tun hnu zelah pawh malsawmna dawng zui zel tlak tura sawrkar tawiawm zel turin a chah a ni. Tuna an hawn thar BNRGSK Building chu khawtlang ro a ni tih hriaa neitu nihna rilru pu chunga a humhalhtu nih tum theuh turin a chah bawk.

Mizoram sawrkar Flagship Programme, NLUP chungchang pawh sawiin, Pu Lal Thanhawla kaihhruai Congress sawrkar hmasain NLUP a kalpui tawh chu chhungkaw tam takin dinchhuahna atan leh leirem rahna atan an hmang tih sawiin, he tanpuina sum hmang diklo chhungkaw tam tak erawh chuan boralna atan an hmang tih a sawi a, mihringin kan damchhunga malsawmna kan dawn hi chhungkua leh mimalin a dawn dan kan thiam loh chuan vanduaina a ni thei tih hre reng tura chahin NLUP dawngtute chu Mizoram mipuite tana entawntlak ni tur leh dik taka hmanga hlawhtlinpui ngei tum turin a chah bawk.

Chhiahtlang VC ten an sak he BNRGSK building hawnna inkhawm hi Pu Malsawmtluanga BDO, Serchhip chuan a kaihruai a, building hi June 2, 2011 atanga sak tan Chhiahtlang Village Haat Building chungah sak a ni a, a dung ft 52 leh a vang ft 24 a sak a niin cheng nuaih kua senral a ni.