4130/2023-2024
Champhai, the 12th March, 2024: District AIDS Prevention and Control Committee (DAPCC), Champhai District ruahmanna bawhzuiin State AIDS Control Society leh DIET Champhai buatsaihin vawiin atang khan I&PR Auditorium Champhaiah private school zirtirtute tan adolescent education programme chungchang inzirtirna training thawhkhatna ni thum chhung awh tur chu tan a ni.

Training chhung hian DIET Champhai Lecturer, Master Trainer hrang hrang Pi Vanlalruati, Pi Hnamte Rebecca Lalbiakdiki, Dr. C. Lalnunzira, Pi Vanlaldiki, Pi K. Lalremsangi leh Pu R. Lalsawmliana te'n zirtirna an pe dawn a, anni bakah hian Health & Family Welfare Department Champhai lam atangin zirtirna pek an ni bawk ang. Champhai District chhunga private middle school, high school leh higher secondary school hrang hranga zirlai naupangte hnenah HIV/AIDS hluar leh darh zel tur do bakah drugs hman khawlohna ven kawnga pawimawhte, rilru leh taksa hrisel nana pawimawhte, nunphung mawi leh thate inzirtirna adolescent education programme kaltlanga pek a ni dawn a. Zirlai naupangte zirtirna petu tur zirtirtute tana training pek hmasaka bultan niin, anni hian an thawhna school theuha zirlai naupangte training an pe chhawng ve leh dawn a ni.

Training tur hian private school tin atangin zirtirtu 2 (mipa leh hmeichhia) te thlan niin batch hniha training buatsaih a ni dawn a. A thawhkhatna hian vawiin March ni 12 atanga 14, 2024 thleng a awh dawn a, he hunah hian Champhai khawpui pawna private school zirtirtute an tel a. Ruahman dan chuan training thawhhnihna hi Champhai khawpui chhunga private school-te tan March ni 18 atanga 20, 2024 chhung hian neih tum a ni.

Training kaltlang hian Champhai District-a private middle school 43 atangin zirtirtu 86, high school 11 atangin zirtirtu 22, higher secondary school 5 atangin zirtirtu 10, avaiin private school 59 atanga zirtirtu 118 te chu adolescent education programme kalpui tura zirtirna pek tum an ni a. Champhai khawpui pawn atangin school 36 (middle school 22, high school 10 leh higher secondary school 4) leh khawpui chhunga school 23 (middle school 10, high school 9 leh higher secondary school 4) te chu training tura thlan an ni.

Attachment

  • Loading attachment...