4131/2023-2024

Khawzawl 12th. March, 2024 : ICDS Khawzawl Project bultumin, Rashtriya Poshan Pakhwada, 2024 hman mek pualin vawiin chawhma dar 11:00 khan Khawzawl Electric veng YMA Hall-ah Indigenous Toys Fair buatsaih a ni a, hetah hian Khawzawl khawpui chhunga Anganwadi 24 atangin Anganwadi Workers leh Helpers ten naupangte infiamna tur hmanrua an siam chi hrang hrang an pho chhuak a ni.

Indigenous Toys Fair neih dawn hian hawnna hun tawi hman a ni a. Hetah hian Pi B. Zoramthangi, Circle Officer, Khawzawl chuan ECCE kalpui a nih tawh avangin Teaching Learning Material (TLM) chu naupangten Centre a nuam ti taka an kal theihna tura hmanraw pawimawh tak a ni tawh a, hei vang hian Indigenous Fair pawh hi buatsaih a ni a ti a. Thil lem chi hrang hrang hmanga naupangte zirtir an nih hian naupang thluak tichaktu, tihrawl te leh lian te hmangin zirna hrang hrang kan kalpui a, heng thil lem kan siam te hi pawisa sen ngai lo, an hriatna ti thang thei turin siam an ni a ti. Circle Officer chuan nitin kan hnathawh lanna ber Poshan Tracker hi nitin Upload a ngaih avangin tumah inthlah loh a pawimawh a ni a ti bawk a. Nikhat kan inthlahdah hian Centre a Nutrition kan dawn tur a tlahniam thei a, chuvangin kan hnaah taimak kan chhuah zel a ngai a ni a ti bawk.

He hunah hian Pu Lalruatfela Sailo, Block Coordinator, Poshan Abhiyan pawhin thu sawiin ICDS Khawzawl Project in Rashtriya Poshan Pakhwada, 2024 hman meka an hmalakna turte a tarlang ve bawk.

Vawiin Indigenous Toys Fair-ah hian thawmhnaw hlui, Mau, thing, lehkha chhia, mawza hlui, La, bur chhia, artui kawr, thingzai bung leh Sarang hmang te a siam tualchher naupang infiamna hmanrua chi hrang hrang phochhuah a ni a. Centre tin a Worker ten an thil siam naupangte tana a tangkaina tur an sawi ve bawk.