4132/2023-2024

Dated Siaha 12th March 2024 : Vawiin chawhma dar 11:30 khan 'District Legal Services Authority' buatsaihin District Jail, Siahaah 'Mental Health Camp' neih a ni a, Pi Lalhriatpuii, Secretary, District Legal Services Authority chuan hun a kaihruai a ni.

Dr. C. Lalrosanga, District Medical Superintendent, Siaha chuan thusawina neiin Jail tangten an mamawh em em 'Mental Health Camp' neih a ni chu lawmawm tiin Jail tangten an hlawkpui ngei a beisei tih a tarlang a. Khawi hmunah pawh awmin eng dinhmunah pawh ding ila a pawimawh ber chu hriselna tha neih hi a ni, ti. Dr. C. Lalrosanga chuan hriselna awmzia sawifiahin taksa leh rilru hriselna piah lamah midangte nena hlim taka nun ho hi a ni, a ti a. Rilru lam hriselna hi jail tangte tan a pawimawh zual nia a hriat thu sawiin, rilru hrisel nei turin mahni kan pawimawh hle a, jail tangte chu an thil tihsual hre reng lo a, rilru insiam thar a hmasawnna kawng zawh turin a fuih a ni.

Khawvel changkang zelah rilru lama harsatna nei kan tam hle tih sawiin Dr. C. Lalrosanga chuan mitinin rilru lam harsatna hi kan tawk thei vek a ti a. Rilru hrisel neite chuan harsatna hrang hrang an tawhte hi an paltang thei thin a ti a, jail tangte pawh harsatna hrang hrang an tawhte paltang thei turin rilru huaisen leh tumruhna nei tura an ngaihtuahna seng turin a fuih a ni. Mizoramah rilru lama harsatna tawk tam tak an awm laiin mi tam takin mithiam rawn chu thil zahthlakah an ngai fo thin a, hei hi thil pawi tak a ni, a ti. Mithiam rawn hi thilzahtlak a ni lo a, damna thlentu a nih zawk avangin rilru lama harsatna tawkten mithiam zawk rawn uar leh ngaihpawimawh a tul takzet a ti. Rilru natna hi taksa natna ang tho a enkawl dam theih a ni a, hun erawh a duh rei deuh a, chuvangin enkawl hmat a tul tiin rilru lama harsatna neite chuan a hma lama mithiam rawn thin turin a chah a. Siahaah 'District Mental Programme' kalpui mek a nih thu sawiin Dr. C. Lalrosanga chuan he programme hnuaiah hian Nurse leh Councellor- te rawn theih reng an nih thu tarlangin Jail tangte leh Siaha mipuite chuan chhawr tangkai turin a sawm nghal bawk.

Dr. C. Lalrosanga chuan Jail tang damlote tan medical check-up a neihpui nghal a. Pi. Merilyn MS Mawii Beiho, Psychiatric Nurse, District Mental Health Programme, chuan rilru hrisel nei tura thil pawimawh leh tangkai hrang hrang inzirtirna 'Awareness' neihpuiin, Pi Lalawmpuii, Clinical Psychologist , District Mental Health Programme, chuan jail tangte rilru hriselna lam endikna hun a hmang bawk.

Pu HC. Lallianvuta, Superintendent, District Jail, Siaha chuan lawmthu sawina neiin hun a khar a ni.