4133/2023-2024

2024 Vau thla ni 12: Young Mizo Association (YMA) Rawpui Branch chuan an kum 50 tlin pualin March ni 11 & 12, 2024 khan Golden Jubilee an lawm a. Member of Parliament (Rajya Sabha) Pu K. Vanlalvena chuan Khuallian niin a hmanpui a. Branch YMA Run sak thar chu a hawng nghal bawk.

Vawiin, March ni 12 (Thawhlehni)-a Rawpui Community Hall-a YMA Golden Jubilee lawmna inkhawm buatsaihah Khuallian Pu K. Vanlalvena chuan thu sawiin, YMA member leh mipui kal khawmte chu Golden Jubilee chibai a buk a. India ram state danga an neih ve loh, mi nawlpui tel theihna pawl, ram leh hnam humhalh kawnga theih tawp chhuah ṭhin YMA ang kan nei hi Mizote kan vanneihna a ni, a ti a. Pathianin ram min pek humhalh chu a chhunga chengte mawhphurhna a ni tiin, a bik takin ṭhalai leh zirlaite chu zirna leh thiamna hmanga ram la a, ram leh hnam tan theih tawpa ṭang zel turin a chah a ni.

Pu K. Vanlalvena chuan Rawpui khuain sawrkar puihna tel miah lova YMA Run ṭha tak mai an puitlin thei leh kum 1992 aṭanga library changtlung tak an nei chu fakawm a tih thu a sawi a. Rawpui Branch YMA chu ram leh hnam humhalh kawnga theih tawp chhuah chhunzawm zel tur leh khawtlang muantu ni zel turin duhsakna a hlan a ni.

Rawpui Branch YMA hi kum 1974 March ni 11 khan din niin, tun dinhmun (2024)-ah member 528 an awm mek a. Branch YMA kum 50 tlin lawmna hi ni hnih chhung hman a ni a. Khuallian Pu K. Vanlalvena, MP (Rajya Sabha) chuan a ni hnihna, March ni 12-ah hun hmanpuiin, YMA Run sak thar a hawng nghal a. Khual zahawm, Central Young Mizo Association (CYMA) Finance Secretary Pu MS Ralte chuan a ni khatna, March ni 11-ah hun hmanpuiin, golden jubilee lungphun a hawng thung a. March ni 11 chhun lam leh zan lamah leh March ni 12 chhun lam leh zan lamah te jubilee lawmna vantlang inkhawm buatsaih niin, March ni 12 chawhnuah cultural programme leh zanah jubilee concert buatsaih a ni bawk a. Tlai lamah golden jubilee lawmna ruai ṭheh a ni bawk.

Rawpui khua hi Hnahthial District-a awm a ni a. Branch YMA Golden Jubilee lawmna hi CYMA, Lunglei Sub-Headquarters, Hnahthial Sub-Headquarters, Pangzawl Group YMA hruaitute leh Rawpui Welfare Committee, Aizawl te'n an telpui a. Khaw hrang hranga Rawpui khaw mi leh sa awmte pawh haw khawmin, khawtlangin hlim takin hun hman a ni.

Rawpui Branch YMA Run sak thar hawn tak hi Zopa chhiara chhawng thum a ni a. Kum 2022 khan sak ṭan niin, a sak nan ₹ nuai 36 sen a ni a. A chung berah Committee Room leh kawng ânah Library dah niin, a chhawng hnuai ber chu khawtlang mipui in luah tur khaihlakte tana man chawia luah theih tura ruahman a ni.