4134/2023-2024

Mamit 12th March, 2024 : Mamit pana zinkawng National Highway 44A zawh thinte chuan kan hriat theuh angin chawhmeh bazar-na hmun kan neih zinga pakhat Dampui bazar chu kan tangkaipui thin hle a.Amaherawhchu Bazar thutna hi mumal taka sak loh, khawr chawpa thlai thartu leh chawhmeh zuarte an thu mai thin chu Pu Lalnunhlua, Deputy Commissioner, Mamit hmalakna leh NABARD tanpuinain Dampui Rural Haat hi sak a ni a. National Bank for Rural Development (NABARD) in Off Farm Development (GVN) hnuaia grant assistance an pek atanga sak niin February 2023 atanga bul tanin February 2024 hian sak zawh a lo ni ta a ni.

He Rural haat hi Cheng Nuai 15.75 a sak niin Cheng Nuai 15 hi NABARD in a tum a; Cheng 75,000/- hi a hnathawktu (Executing Agency) Village Council, Dampui te’n a tha manin an thawh ve bawk a ni. Rural Haat Committee VCP Chairman na hnuaiah dingin, DC Office aiawh, NABARD aiawh, VC member te, Dampui NGO hrang hrang aiawh te leh Bazar hmangtu tur aiawh te telin Fund hman dan thlir ho thin a ni a. Sum hi installment 4-a pek niin, 1st installment ah Nuai 3, 2nd leh 3rd installment-ah Nuai 4.5 ve ve pek niin, Final installment ah Nuai 3 an hmu bawk.

Rural Haat enkawl zui zel tur hi Village Council Dampui in a ruat ang a. He Rural Haat hi kum 2 chhungin a inenkawlna thawk chhuak thei (self-sufficient) tura beisei a ni a. Bazar luah man (rent) thawh chhuah kawngah te, faina kawngah te, bawlhlawh thliar hran leh paih dan (waste management) lamah te mawh an phur zui ang.

Rural Haat hi Pi Carolyn L.B. Khiangte Sub-Divisional Officer (Sadar) Mamit chuan a hawng a, NABARD lam atangin PU J.D.Traite in thu a sawi bakah, Pi Lalengmawii Lead District Manager leh Pu Lalthanmawia, Mizoram Rural Bank te'n an telpui bawk a ni.