4651/2024-2025
Dated Serchhip, the 14th March, 2025: Vawiin khan RD, PHE, Horticulture Department Minister Prof. Lalnilawma chuan a department enkawl hnuaia hmalakna te enin Aibawk leh Serchhip Zawlpui ram a tlawh a. Serchhip Horticulture Division hnuaia hmalakna hrang hrangte a hmunah en puiin, Zawlpui phai atang hian tun aia hlawk zawk leh hnianghnar zawka thlai thar chhuah a nih theih nana hmalak dan turte a enpui a, Mat Lui kanna tur Lei tha zawk dawh theih dan turte a en bakah department hrang hrangte nena thawhho zel dan turte an sawiho nghal bawk a ni.
Khaw pathum-Aibawk, Sateek leh Phulpui khaw tana ruahman Aibawk Water Supply Scheme, kum 2013-2017 chhunga NLCPR (Ministry of DoNER) hnuaia thawh chu a tlawh a. He tuilak hi JJM hnuaiah kum 2022-2023 chhung khan thawh chhunzawm niin Cyclone Remal in nasa taka a khawih chhiat avangin a tul zualte theih ang anga chei that hna thawh tawh niin furpui lo thlen hma hian thuam that hna thawh tul laite a enpui a. Aibawk Plastic Waste management Unit hmalakna te a enpui bawk a ni.
Serchhip Zawlpui phai chhungah hian Mat lui km 9 vel a luang tlang a, Horticulture Department hian kumtin Zikhlum, Tomato leh thlasik thlai dang chi (seed) nul siamtute hnenah a pechhuak thin a, kum 2024 chhung khan Zikhlum chi bur 100, Tomato chi 100 Pkts, Dawnfawh chi 80 Pkts a lo pe chhuak a, PMKSY – PDMC (Pradhan Mantri Krishi Sinchayee Yojana - Per Drop More Crop) leh RKVY- PDMC (Rashtriya Krishi Vikas Yojana - Per Drop More Crop) scheme hnuai ah drip leh sprinkler irrigation engemaw zat pe chhuak tawh in, kum 2024 khan Drip leh Sprinkler irrigation chhungkaw 24 hnenah pek belh niin, he mat lui kam vel a zau (cluster) hrang hrang pariat (8)te chuan an hmang tangkaiin, tun dinhmunah chhungkaw 160 velin thlai hmun leh nul siamin eizawnna ber atan an hmang tangkai mek a ni.
Serchhip Zawlpui-ah hian thlai hrang hrang Zikhlum, Bawkbawn, Tomato, Hmarchapui, Antam, Parbawr, Brocolli, Lettuce, Knol Khol, Carrot etc chin thin niin, kartin Mizoram hmun hrang hrang Aizawl, Lunglei, Saitual etc ah te motor-in trip 20 – 30 vel an thawnchhuak thin a, kumtin Zawlpui atanga thlai hralhna man hi Nuai 300 – 350 vel ni thinin, kumin 2025 pawh hian Nuai 400 chuang leichhuah leh an inbeisei leh a ni.
Minister hi Horticulture Department Secretary Pi Ramdinliani, Horticulture Deptartment Director Pu C.H. Lalmuanpuia te bakah sawrkar mi pawimawh dangten an tawiawm a, Additional DC Pu Lalrinzuala bakah Serchhip District Horticulture Department Officer Pu Lalrintluanga, EE PHE, Pu Isaak Lalchhuanmawia leh sawrkar mi pawimawhten an lo dawngsawng a ni.
