4650/2024-2025

AIZAWL; the 14^th March, 2025: Vawiin chawhnu dar 1:00PM khan Senior Club Mizoram High Council vawi 3-na chu Social Welfare Minister Pi Lalrinpuii  leh Pi Lalliani, General Secretary, M.H.I.P Gen Hqrs  chuan khuallian leh khualzahawm niin an hmanpui.

He hunah hian thu sawiin  khuallian Pi Rinpuii chuan Mizoramah hian kum lama Upa zawkte pawl din, anmahni enkawl leh buaipui, pawl ropui tak mai – Mizoram Upa Pawl kan nei a. Kawng hrang hrangin an tangkai em em a ni. Record pakhata ka hmuh dan chuan Mizorama MUP member hi April, 2023 khan mi 64,100 (Sing ruk sangli za) an ni a. Mizoram mipui zinga kum upa heti zat kan awm lai leh hetianga kum lama upa zawk ten pawl tha tak kan neih laia, kum lama upate ngaihsak a, enkawl a, buaipui tur bik pawl – Senior Club, Mizoram a lo ding hi lawmawm ka ti hle mai.

Hun siamtu hi Pathian a ni a, Hun inher zelin a hrin - upatna pawh hi Pathian min siam dan a ni a. Danglam thei lo a ni. Chuvangin mi zawng zawng hi a ni telin kan upa deuh deuh zel a, Pathian zara kan dam anih chuan Tar- dinhmun hi kan la luah vek dawn tih hi kan hriat thar leh ka duh hle mai. Kum upa te chu an taksa a lo chak lo telh telh a, rilru leh taksa lamah zah tak, hmangaih leh duat taka enkawltu an mamawhna a zual telh telh thin.

 “Aia upate zah thiamin, an thu te awih in zawm fo rawh” tih hla te kan nei a, hmanlai ram chhuah laia an tawngkam “Upa sa kah” tih te, “Upa thluak fim nge nge” tih tawngkam te hi tun thlengin a awmzia ala pawimawh em em a. Tin, nupui pasal inzawnna kawngah pawh “Dam rei chhung an ni em” tih an lo zawh thinte atang ringawt pawh hian kan society chuan upa zawkte dinhmun a dahhniam lo hle tih a lang chiang in ka hria.

Amaherawhchu, “Kum a tam telh telh a, rilru erawh a naupang chhia telh telh thin” tih tawngkamte hian kum a lo upat deuh deuh hnu a upate harsatna tawh thin chu a tarlang chiang viau in ka hre thung. Hun siamtu hi Pathian a ni a, Hun inher zelin a hrin - upatna pawh hi Pathian min siam dan a ni a. Danglam thei lo a ni. Chuvangin mi zawng zawng hi a ni tel in kan upa deuh deuh zel a, Pathian zara kan dam anih chuan Tar- dinhmun hi kan la luah vek dawn tih hi kan hriat thar leh ka duh hle mai.

 Kum upa te chu an taksa a lo chak lo telh telh a, rilru leh taksa lamah zah tak, hmangaih leh duat taka enkawltu an mamawhna a zual telh telh thin.

Kan mizo nunphung tlangpuiah chuan inpui changtu fapa in, a nu leh pa te chu anlo tar chaklo hnu thleng pawhin a chawm in a enkawl thin a. Chuvangin, tun hma lamah kha chuan kum upa te hian chenna tur leh ei leh in lamah harsatna an tawk lo viau thin a. Mahse chhungkua a zirin upate thlavang hauh a, thlamuang tak leh rilru hlim taka awm tir vek erawh a harsa viau in a rinawm.

Chutih lai chuan tanpuitu lar tak – “Zo Inspiration” te chuan hmun hrang hrangah kum upa leh chaklo, enkawltu leh chenna mumal nei lutuk lo an hmu chhuak a, an tanpui thin thu kan hre thin a. Tin, kan Department – Social Welfare, Tribal Affairs Department pawh hian Old Age Home kan nei a, chuta enkawl kan neih dan atang te, old age home hrang hranga awm an pun chhoh zel dan atang hian sap ram anga enkawltu neilo kum upa te hi an tam telh telh dawn niin a lang.

Chuvangin, kan sawrkar pawhin theihtawp in upate ngaihsak a tum a. Hna hmasa berah Kum upa te, hmeithai leh rualbanlo te pension kan han tipung nghal a. Social Welfare Department leh RIPANS tangkawp in Geriatric Care givers training kan buatsaih bawk a, Batch khat an chhuak tawh a, buatsaih leh zel pawh kan tum a ni. Tin, old age home kan neih ho te pawh hi tihchangtlun a tihlen zel dan tur kawng te pawh kan ngaihtuah chho mek zel bawk.

Hetiang hian sawrkar ang chuan hma la in, ruahmanna te pawh nei mah ila,kum upa te mamawh ber chu rilru hlim leh thlamuang taka an khawsakna tur leh duat leh hmangaih taka enkawltu tur chhungkua hi a ni. Kum upate mamawhang chhungkua din a, nei thei tur hian theihtawp chhuah tlang zel turin vawiin a lokal khawm zawng zawngte ka sawm a che u.

Hnam lungphum innghahna chu upate an ni a, thalaite hi hnam chakna an niin, naupang zawkte hi hnam beisei innghahna anih avangin kum upate hi kan thlahthlam thei lo mai ni loin, kan thlahtlam thiang lo a. Kan theih tawka humhalh a, duat tak leh zah taka enkawl hi kan tihtur a ni tih hre thar theuh turin vawiin a lokal khawm zawng zawngte ka chah nawn leh duh che u a ni e, a ti.

Khualzahawm Pi Laliani pawhin thu sawiin Hmasang atangin aia upa te zahna hi mizo nunah a bet nghal a, aia upa te an bar khalh ngai lo, aia upa te an sual ngai lo, aia upa te an hnial ngai lo ti te leh upa te zahna tawngkam bungrua kan ngah hle te hian a tilang chiang hle a ni. Mahse kan khawvel changkang zelah hian In lama upa chak tawh lo te enkawltu leh kawm hlimtu an awm lo telh telh a, Old Age Home pung ve zel hi a ur thlu ve tawh hrim hrim kan ti nge? Upa te enkawl kawngah kan tla hniam deuh ta zawk nge ni ang? tih te hi i ngaihtuah ho ang u. Upa ten kan in chhunga inthlahrung lo leh nun thlamuang tak leh hlim taka an awm theih nan chhungkaw tin ten tan i la zual sauh ang u, a ti.

Vawiin Senior Club Mizoram High Council vawi 3-na programme hi Pu C.Dinthanga, President Senior Club in a kaihruai a. Kum 2025-2027 chhunga Senior Club Mizoram hminga Project tih hlawhtlin tur rawtna leh sawihona hun  te hman niin, kum 2025-2027 chhunga hruaitu tur thlanna hun an hmang nghal bawk a ni.