4649/2024-2025
Aizawl, the 14th March 2025: Mizoram Youth Commission (MYC) leh TOP International Human Resources Management Consulting, Taiwan te chuan vawiin chawhma dar 11:00 khan Labour, Employment, Skill Development & Entrepreneurship (LESDE) Minister Pu Lalnghinglova Hmar kaihhruainain, MYC Chairman Office Chamber, MINECO, Khatla-ah thawhhona tura bultanna 'Letter of Intent (LOI)' an ziak.
He hunah hian Mizoram Youth Commission aiawhin Pu Malsawmzuala Ralte, Chairman, MYC leh TOP International Human Resources Management Consulting aiawhin Pu Angus Shih, Chairman ten hming an ziak. Mizoram Youth Commission aiawhin Pi V. Lalmuanpuii, Secretary, MYC leh Pu Jonathan Lalremruata, OSD to CM bakah TOP International Human Resources Management Consulting hotute'n an tawiawm a ni.
An thawhhona turah hian TOP International Human Resources Management Consulting, Taiwan te'n cheng nuai 50 an rawn pek tur hmangin MYC Aizawl Campus-ah Chinese tawng zirna, Mandarin Language Learning Centre din a ni ang a. Mizo thalai Manadarin tawng zir chhuakte hian Taiwan-ah hna an thawk zel thei dawn a ni. Mizo thalai 1000 Taiwan-a hnathawk tura thawn tum a ni a, bultan nan thalai 100 thawn phawt a ni ang. Hemi hnu hian thawhhona tluantling, MoU buatsaih zui a ni ang a, chumi peih fel hnuah chak taka hmalak nghal a ni ang.
TOP International Human Resources Management Consulting, Taiwan hotute hian nimin khan Chief Minister Pu Lalduhoma New Delhi zin an rawn zui haw a. Nizanah LESDE Minister Pu Lalnghinglova Hmar hovin Assembly House-ah hmalak dan tur leh thawhho dan tur sawiin an inkawm a; inrem lailawkna ziah ni se an tih chu chak taka bawhzui nghal niin vawiinah ziah fel a ni ta a ni.
