4648/2024-2025
Aizawl dated 14th March, 2025: Vawiin chawhnu khan Irrigation & Water Resources Department bultumin IWRD Auditorium, MINECO-ah 'Our Rivers, Our Future' tih thupui hmanga '28th International Day of Action for Rivers' puala hun hmanna chu Pu PC Vanlalruata, Minister, IWRD chuan khuallian niin a hmanpui a. Pu Lalrothanga, Secretary chuan he hun hi a kaihruai a ni.
Irrigation & Water Resources Department Minister Pu PC Vanlalruata chuan Mizorama a vawi khat nana International Day of Action for Rivers hman a ni chu lawmawm a tih thu sawiin he hun hmanna hian Mizoram chhung a kan lui te, kan tui hna leh ram ngaw te leh leilung hausakna hrang hrang humhalhna kawngah awmze thui tak a neih ngei a beisei thu a sawi a. A tel lo a kan awm theih loh 'tui' renchem, vawn thianghlim, tui hna humhalh leh bawlhhlawh tih tlem kawngah mi tinin mawhphurna kan neih thu sawiin vawi khat hman plastic hman tlem leh bawlhhlawh, thil tangkai siamchhuah nana sawngbawl kawngahte hmalakna kalpui a pawimawh thu a sawi. Irrigation Minister chuan kan ram leilung hausakna humhalh tur hian nakin nghak lovin, tun atang hian kan theihna zawn zel ah penchhuah a pawimawh thu sawiin kan ram neihchhun hi luah tlaka kan tu leh fate tan kan siam zel theih nan tuna luah mektute hian mawhphurna pawimawh tak kan neih thu a sawi a. Tui renchem leh humhalh kawngah midangte entawntkak leh zirtirtu nih tum theuh turin kalkhawmte a chah bawk a ni.
'28th International Day of Action for Rivers' pual a hun hmanna ah hian Slogan, Photography leh Painting Competition lawmman sem a ni a. Pu Romalsawma, President, Save the Riparian chuan tui hna humhalh leh bawlhhlawh paih fimkhur pawimawhna te, bawlhhlawh siam tlem leh vawi khat hman plastic avanga leilung hausakna a nghawng chhiat dan te a tarlang a. Save the Riparian Phase I leh II hmalakna hnuai ah ni 50 chhung lui dung leh kawr thenfai hnatlang kalpui chhungin bawlhhlawh pick up trip 298 thenfai bak ah Phase III kalpui mek ah World Bank kawng dung ah leh district hrang hrang ah bawlhhlawh ton 8.81 chharkhawm te chu Solid Waste Management Centre-ah paih a nih thu a sawi a. Pu Laltotluanga, Chief Engineer, Irrigation & Water Resources Department chuan lawmthu sawina hun a hmang bawk a ni.
Slogan Writing competition a lawmman dawngtute chu:
Florence Lalthanzuali, Mizoram College of Nursing, Falkawn
Benjamin Lalrinawma, Bethlehem veng
Lalvensanga Chawngthu, Khatla
Photography competition a lawmman dawngtute chu:
H.Lalthangpuia, Salem Veng
Albana Chawngthu, Mission veng
Rolianpuia, New Capital Complex
Painting competition a lawmman dawngtute chu:
Malsawmkima, Govt. Aizawl College
Francis Lalnunfela, Pachhunga University College
R.Lalfakzuala, Mizoram Christian College 28th International Day of Action for Rivers puala inelna hrang hranga 'Over All Champion' Trophy hi Pachhunga University College-in an la a ni.
