No.7285/2020-2021

“Professional Boxing khawvelah Mizote kan lang thuai ang. Mizoram hi ‘Boxing Hub’ ah kan siam dawn.” - Pu Robert Romawia Royte

Vawiin khan Sports & Youth Services Minister Pu Robert Romawia Royte chuan ama office chamber-ah tualchhung chanchinbumite kawmin World Boxing Council hriatpuinain hmarchhak biala professional boxing championship hmasa ber chu March thla tirah Aizawl, Mizoram-ah huaihawt tum a nih thu a hrilh. He professional boxing championship ‘WBC World Youth Title’ hi India ramah chuan a vawi hnihna chauh a ni dawn a, LPS Vision leh Grassroots Boxing Promotion & Management te tangkawpa buatsaih tur a ni a, Mizoram state sorkar pawhin a tul ang zelin a thlawp dawn tih a sawi bawk.

Sports Minister Pu Robert Romawia Royte chuan Mizoram sorkarin Sports hi ‘industry’ ah a lo puan tawh angin discipline hrang hrangah chak takin hmalak zel a ni tih a sawi a. Mizo thalai leh infiammite tan Sports hmanga eizawnna leh sumdawnna nghet siamsak nan sorkar chuan theihtawp a chhuah mek a; LPS Vision leh Grassroots Boxing Promotion & Management te nen Mizoramah professional boxing bultan theih tur hi a lawmawm takzet a ni a ti. Mizo boxer tha tak tak, professional boxer leh khawvel huap pawha champion hial thei tura beiseiawmte an rawn inlar chho zel a, sorkar pawhin theihtawpin anmahni vawrh chho tumin tuna WBC Youth Title Championship-a main event pawh Mizo Boxer Lalrinsanga Tlau vs. Ghana Boxer Eric Quarm a ni dawn tih a tarlang bawk. India ramchhung boxing-ah an thlen san ve theih nan leh BoxRec-ah an hming lan phak nan he boxing inelna awm turah Mizo boxer-te tel a pawimawh dawn a, chuvangin mimal leh tualchhung firm te pawhin heta tel tur Mizo boxer thate hi sumfaia sponsor leh thildanga tanpui thei turte rawn penchhuak turin Sports Minister hian a ngen a ni.  He Title inchuhna hi kumtin Mizoramah neih tum a ni dawn tih sawiin Pu Robert Romawia Royte chuan Mizo Boxer-te professional boxing-ah an luh theihna kawng a tiawlsam sawt dawn a ni, a ti. Mizoram chu boxing hmunpui ‘Boxing Hub’ ah siamin Mizo boxer-te chu khawvel boxing hmunpui Las Vegas an hawlh pha thei a, boxing-ah chuan ‘BER’ nihna kan hauh thei a ni, a ti bawk.

Press Meet-a tel ve LPS Vision Director Pu Lalsawmliana Pachuau pawhin thu sawiin he WBC World Youth Title inchuhna tur hi ‘LPS Fight Night’ tiin March ni 6, 2021 khian R.Dengthuama Indoor Stadium-ah neih tum a ni a, LPS Vision chuan hemi atan hian channel thar siamin entuten man chawiin ‘pay per view’ hmangin an en thei dawn a ni, a ti. Grassroots Boxing Promotion & Management Founder-President Pu Mujtaba Kamal chuan Mizo thalaite chu boxing-ah hmalam eng tak an nei tih sawiin he WBC Youth Title Fight hmang hian Mizoram mai ni lo, India hmarchhak pum boxing khawvelah mellung pawimawh tak kan phun dawn a ni, a ti bawk.