No.7284/2020-2021

Hnam zia rang hmanga zirlaite intihsiakna, Department of School Education & Literacy-in a buatsaih National Kala Utsav 2021 online a neih chu vawiin khan zawh fel a ni.

Kumin National Kala Utsav ah hian hnam ziarang tarlanga  intihsiakna chi hrang hrang 9 neih a ni a, chungte chu-  

1) Vocal Music Classical

2)Vocal Music Traditional Folk

3) Instrumental Music Classical

4) Instrumental Traditional Folk

5) Dance classical

6) Dance folk

7) Indigenous Toys & Games

8) Visual art 3D

9) Visual art 2D

Intihsiakna tinah hian state leh UT atangin mipa leh hmeichhia pakhat ve ve zel chhuakin mipa leh hmeichhe tan a hranga inelna hi neih a ni a. Intihsiakna item tinte hi hnam hrang hrang ten mahni hnam zai, rimawi leh làm kan neih te leh lemziak hmang tea entir a ni a. Intihsiakna hi January ni 11 atang khan neih tan a ni a.  Mizoram atanga chhuak te hi District hrang hrang atanga naupang thlan chhuah te an ni a, nimin tlai khan Mizo naupangte hian an tih tur an zo fel a ni.

National Kala Utsav-ah hian state tinte chu online-in an tih tur hun bi leh dar zat ruat sak vek an ni a. Mizoram atang chuan School Education Centre, Directorate Building Conference Hall-ah neih a ni a. Heta tang hian online in zirlai naupang ten an tihtur te entirin endiktute zawhna pawh an chhang nghal a ni.

National Kala Utsav hi kum tin buatsaih thin a ni a;  state  leh UT aiawh zirlai ten mahni hnam zia rang theuh pho chhuakin intihsiakna neih a ni thin a. Kum dangah chuan National Kala Utsav hi a huhovin hlim taka hman thin a ni a. Kuminah erawh chuan Covid-19 hrileng avangin a huhova hmun khatah hman theih a ni lova, mahni awmna state theuh atangin online-a hman a ni ta a ni.