No.7283/2020-2021

Vawiin khan Serlui bialtu MLA Pu Lalrinsanga Ralte, Vice Chairman, Rubber & Allied Crops Development Board ni bawk chuan Bilkhawthlir-a sorkar hmalakna hrang hrang - PHC Building sak mek te, X-ray khawl dahna tur Building sak mek te leh PWD Rest House sak mek te a tlawh. Bialtu MLA hian Bilkhawthlir-a Basketball Court siam thar tur leh Block Horticulture Office hmun tur te a hmunah a en nghal bawk a ni.

Rubber & Allied Crops Development Board Vice Chairman chuan Bilkhawthlir khua chu khaw intodelh leh taima khua an nih thu sawiin ei leh bara Mizoram  intodelhna tur  atan Bilkhawthlir chu khaw pawimawh tak an ni a, hei vang hian sawrkar pawhin theihtawp chhuaha tihhmasawn a tum mek a ni, a ti. Bilkhawthlir khawtlang mipuite chu  khawtlang hmasawnna tura sawrkar hmalakna hrang hrang te neitu thinlung pua uluk taka enkawl tur leh sawrkar nena thawhhona tha tak nei turin a sawm bawk a ni.

Pu Lalrinsanga Ralte chuan Bilkhawthlir PHC Building leh PWD Rest House satu Contractor te chu sawrkar leh a khaw mipuiin an beisei angin ruahman a nih dan ang taka, tha taka sa turin a chah a. An hnathawh mek chu Bilkhawthlir khua tan chauh ni lo Mizoram leh State pawn atanga khualzin awmte tan pawha hmun pawimawh leh tangkai tak a nih dawn avangin tha leh tlo taka sa turin a ngen a ni. Department lam pawhin Contractor te chu an hna vilpui a, ruahman anga tha taka an hna te an thawh  theih nan enpui thin tura a duh thu Serlui bialtu MLA chuan a sawi bawk a ni.

Bialtu MLA chuan Bilkhawthlira Basketball Court siam thar tur chu a hmunah a tlawh nghal a. “Mizote chu infiamna ngaina leh tuipui kan ni a, infiam mite leh infiamna hmunhma neih thuah pawh khawpui lam leh thingtlang lam te kan intluk tlang chho mek zel a, Basketball Court chu Bilkhawthlir khaw rotling tur a nih avangin uluk leh tha thei ang bera siam tum a ni,” a ti. Pu Lalrinsanga Ralte chuan Bilkhawthlira Block Horticulture Office hmun tur a ennaah thu sawiin Bilkhawthlir khua leh a chhehvel chu kut hnathawka eizawng, thlai thar chhuah kawngah pawh thawhhlawk tak an ni, a ti a. Chief Minister, Horticulture Minister ni bawk Pu Zoramthanga ruahmannain Bilkhawthlir-ah Block Horticulture Office dah tum a nih thu leh Bilkhawthlir khua leh a chhehvel mipuite'n an tangkaipui ngei a beisei thu a sawi bawk a ni.