Vawiin chawhma dar 11:00 khan Health Directorate Conference Hall-ah Clinical Establishment Act. chungchang zirchianna hun pawimawh tak neih a ni a. He hun hi Dr.K.Ropari, Principal Director, H&FW in khuallian niin a hmanpui.
Dr. K.Ropari, Principal Director chuan Mizoramin Clinical Establishment rules kan neih theihna tura zirchianga theihtawp lo chhuahtute chungah lawmthu a sawi a. Mizoramin Drug Policy mumal kan la neih loh avanga harsatna kan tawh thin thute sawiin Pi Ropari chuan "Hman theih mai tura he rules chhawpchhuah a lo ni hi achievement ropui tak a ni a. Hman a nih hun chuan mipuite pawh kan him tawh dawn a ni" a ti.
Dr. Zonunsiama, State Nodal Officer, Clinical Establishment Act. in a tarlan danin Clinical Establishment (Registration & Regulation) Act 2010 hi Govt. of India in State pali - Arunachal Pradesh, Himachal Pradesh, Mizoram, Sikkim leh U.T.'s te hman turin a siam a. Gazette of India ah 19th August 2010 khan tih chhuah a ni. He Act hi Govt. of India chuan 1st March 2012 atang khan hmang tan turin ni 28.2.2012 khan notification a lo chhuah tawh a. Amaherawhchu, Mizoram state chuan Supporting Rules a duan a ngaih avangin hman tan nghal theih a ni lo va. Kan sawrkar hmalakna in The Mizoram Clinical Establishment (Rules & Regulation) Rules 2014 chu ni 6.6.2014 khan Mizoram Gazette-ah chhuah a lo ni tawh a. He Act in a lo Demand tawh angin he rules hi Legislative Assembly ah nikum thlasik thutkhawm khan pharh (lay) a lo ni tawh a ni.
Hemi zulzui hian hmalak mek a ni a. State Council for Clinic Establishment leh District Legislative Authority pawh kan sawrkar hian notification a lo chhuah tawh nghe nghe. He Act Implement a nih theih nan hian hmalak mek a nih thu Dr. Zonunsiama chuan sawiin, Clinic Establishment hrang hrang kaih-hnawih te chu sensitization workshop neih chhoh zel tum a ni. Aizawl leh District ah hma la hmasain kumin June chhung hian registration tih tum a ni a, a tahtawlin Mizoram hi tuam chhuah tum a ni a. He dan hnuaiah hian Mizorama Hospital, Clinic din turte reng rengin Registration felfai taka an neih a ngaih tawh tur thute a sawi. Amaherawhchu, Sipai Damdawiin te erawh he Act hian a huam ve dawn lo thung a ni.
Workshop hi Dr. Lalbiakkima, Director, Hospital & Medical Education in a kaihruai a. Dr.Rohmingthanga, Director of Health Services in kalkhawmte lawmna thu a sawi a, Dr. K. Lalbiakzuala, Mission Director, NHM in hun hnung a khar a ni.
