Vawiin chawhnu dar 1:00 khan Chief Secretary & Chairman, Mizoram State Climate Change Executive Council Pu Lalmalsawma hovin CS Conference Hall ah Council Meeting neih a ni.
Chief Secretary chuan tunlai khawvel sik leh sa danglam nasa lutuk ven nan leh chumi mila eizawnna ngelnghet leh tluantling nei tura hmalak a pawimawh thu a sawi a. Mizoram State Action plan for Climate Change siam peih a nih tawh avanga lawmthu sawiin hmalak chhoh zelna turah Department hrang hrangte thawhhona tha tak nei turin a fuih. Boruak sik leh sa danglam chak chuan mitin min nghawng vangin chumi ven nana theihtawpa hma la tura ngaihtuahna ngun taka sen a pawimawh thu te a tarlang a. Vawi leh khata hmalakna liantham neih nghal mai a rem loh avangin zawi zawia tun atanga kan tih theih tawk te te-a awmze nei taka hmalak tul a tih thu te a sawi lang bawk.
Dr R.K.Lallianthanga, Chief Scientific Officer leh Member Secretary, State Climate Change Executive Council chuan Climate Change chungchanga hmalak tawh dan tlangpui a report a, Mizoram State Action Plan for Climate Change chu National Steering Committee-in a thuphunga a pawm tawh thu a tarlang. Hemi atang hian Project hrang hrang la buatsaih leh tur a nih thu sawiin tunah chuan Ministry of Environment & Forest and Climate Change (MoEF & CC) ah report 4 thehluh tawh a nih thu leh Project Proposal dang thehlut tura inbuatsaih a tul thu te a sawifiah bawk.
He meeting ah hian Climate Change chungchanga hmalak chhoh dan tur hrang hrangte sawiho a ni a, Planning & Programme Implementation, Environment & Forests, PHE, Agriculture, Rural Development, Horticulture leh Tourism Secretary te bakah Science & Technology Directorate Officer te an tel a ni.
