Vawiin chawhnu dar 2:00 khan Health Minister Pu Lalrinliana Sailo hovin "The Pre-conception and Pre-Natal Diagnostic techniques (Prohibition of Sex Selection act, 1994) chungchang thu rel leh sawi ho a ni.

He meeting pawimawh tak mai Pu Lalrinliana Sailo Office Chamber-a neih ah hian Pi Esther Lalruatkimi Health Secretary bakah Health Department Director hrang hrangte an tel a ni.

He hunah hian Prohibition of Sex Selection act, 1994 chungchang ngun taka sawiho a ni a. He Act hi Sex chungchang leh nu naupai ten an fa pai te hriat lawk theih dan kawng dap a, duhthlanna nena paih emaw tihchhiat dan emaw an ngaihtuah thin venna tur atana duan a ni a. He dan chungchang hi sawifiahin Minister chuan " Nau pai laia khawl hmanga kan nau paite mipa nge hmeichhia an nih tih zawh hi dan in a khap tlat a, a zawttu chu dan kalh a nih avangin man theih a ni a,a hrilhtu pawh chutiang bawkin dan bawhchhetu man theih a ni a. Sum tam tak chawi leh lung In hial tan theihna a ni. Chuvangin hetiang kawngah hian Mizote hi kan thanharh a ngai a ni" a ti a. Hetiang kawnga India ram hmun dang dinhmun tarlangin state thenkhat ah te chuan hmeichhia an nih hre lawk a nau ti tla ta mai an awm thin thute a sawi bawk a. He thil hi Pathian duhloh zawng, kristian state te tih atana mawi lo thil pawi tak a nihna leh dan phalloh a nihna hi kan hriat chian a ngai tak meuh meuh a ni, a ti bawk.

He hunah hian Pu Lalrinliana chuan Department thawktu hnenah theihtawpa hetiang thil hi do a nih theih nan mipuite zirtirna pek tam lehzual ni se a duhthu e tarlang bawk a. Private-a Ultrasound Khawl neitute pawhin Dan in a phut anga Registration neih thlap a ngaih thu te pawh sawiho a ni bawk.