Vawiin khan Vanapa Hall ah Project HIMNA-MADAT hnuaia hmalakna hnuaia buatsaih IEC Materials and Research Study leh Modules tlangzarhna hun hman a ni a, Pu Ashish Kundra, IAS, Commissioner & Secretary, Genaral Administrative Department chu Khuallian niin, Dr C Vanlalramsanga, IES, Secretary, Planning & Programme Implementation Department chu Khual Zahawm a ni a, Prof. Vanlalhruaia, Principal IASE, Pi Zochhuani, Vice Principal DIET, NGO hrang hrang hruaitute, School zirtirtute leh zirlai ten he hun hi an telpui a ni.

Khuallian Pu Ashish Kundra, IAS, Commissioner & Secretary, Genaral Administrative Department chuan “Mizoram chu ziak leh chhiar thiam tamna kawngahte, ralmuanna kawngahte state dangte lakah hma hruaitu kan nih mek lai hian kawng dang duhawm loh tak tak, Cancer tamna leh HIV vei tamna te pawh kan ni a, heng thil thalo do let tur hian kan zirlai naupangte hi an pawimawh hle a ni,” a ti a, Aizawl DC kaltlanga Project HIMNA-MADAT an buatsaih chu lawmawm a tih thu sawiin,” Mizoram Against Drugs, Alcohol & Tobacco hi Mizo zirlai naupangten ruihhlo an dona kawnga hmanraw pawimawh tak ni turin leh hriselna kawnga hmasawnna kan hmuh ngei theina turin duhsakna ka hlan a ni,” a ti bawk.

 He hun hi Dr A Muthamma, IAS, DC Aizawl in a kaihruai a, Prof. Vanlalhruaii, Principal, IASE in Project HIMNA-MADAT chungchang report te pein, he project hnuaia School thlanchhuah a zirlai naupang atangin HIMNA Club activity report ngaihthlak a ni bawk a ni. Dr C Vanlalramsanga, IES chuan “An Analytical Study of Substance Abuse among Upper Primary School students in Aizawl District” leh HIMNA-MADAT chungchang Documentary Film a tlangzarh a, Pu Ashish Kundra, IAS chuan ruihhlo laka naupang an fihlim thei nana HIMNA-MADAT Project kaltlanga buatsaih, pawl 5 leh pawl 6 zirtur Module-I leh Pawl 7 leh Pawl 8 zirtur Module II a tlangzarh nghal bawk.

Project HIMNA-MADAT hi June 21, 2017 khan bul tan niin, Vaihlo, Zu leh dawidawi ruih theih laka thalaite an fihlim theih nana zirlai an nih lai atanga  zirtirna tha pek hi a tum ber a ni. Kum 2017 khan Aizawl district huam chhunga school 50 thlan chhuah niin heng school ah hian HIMNA-MADAT Project hi kalpui a ni a, HIMNA Club te din niin zirlai naupangte chu kawng hrang hrangin ruihhlo thatlohnate zirtir an ni thin a ni. Tunah hian he project kalpuina Govt. Upper Primary School 277 awm in hengah te hian HIMNA Club din vek a ni tawh bawk. HIMNA-MADAT project a tan hian  Aizawl DC kaihhruaina hnuaiah Health, Education, Social Welfare Department te leh NGO hrang hrang te nen thawh hona neih a ni bawk.