Aizawl DC Office in a kalpui mek school naupang te ruihhlo laka an himna tura hmalakna Project HIMNA-MADAT (Mizoram Against Drugs, Alcohol and Tobacco) hnuaiah November 12,13,15&16 chhung hian Central YMA Hall leh SSA Conference Hall, Chaltlangah 'Training of Nodal Teachers' neih a ni dawn. 

He training-ah hian Aizawl District huamchhunga Project HIMNA-MADAT hnuaia school thlan zinga Block Resource Centre (BRC) 4 - Sikulpuikawn, Bawngkawn, Aibawk leh Chhinga Veng te a Project HIMNA-MADAT Nodal teacher te an tel dawn a. An ni bakah hian Kohhran hrang hranga Project HIMNA-MADAT hnuaia Community Coach te an tel bawk ang. 

Training hi hmun hniha neih tur niin a hlawm khatna hi November 12 & 13 ah neih a ni dawn a. He hunah hian CYMA Hall, Tuikhuahtlangah Sikulpuikawn BRC huam chhunga Nodal Teacher te an tel ang a, Pu Zohmingthanga, District Education Officer in kaihruaiin Aizawl DC, Dr. A. Muthamma-in hawnna a nei ang. 

SSA Conference Hall, Chaltlangah pawh hawnna hun hran neih a ni leh ang a, Pi Lallianzuali Bawihtluang, District Project Coordinator, SSA, Aizawl District in kaihhruaiin Prof. Vanlalhruaii, Principal, IASE in hawnna a nei ve thung ang. 

'Training of Nodal Teachers'-ah hian October 24, 2018 a tlangzarh tak Project HIMNA-MADAT hnuaia middle school naupangte tana buatsaih zirlaibu pahnih, Module I&II chu zirtirtuten an naupangte an zirtir dan tur leh community coach-te pawhin zirtirna an pek dan tur mithiamten an zirtir dawn a ni. 

Training hi November 15&16 ah Aibawk leh Chhinga Veng BRC hnuaia zirtirtute leh Community Coach te tan chhunzawm leh a ni ang a, hawnna inkhawm pawh a hrana siam leh a ni ang. Project HIMNA-MADAT hnuaiah hian Aizawl District chhunga Middle School 227 a naupangte ruihhlo laka an filhlim theih nan chak takin Aizawl DC Office chuan hma a la mek a ni.