1019/2024-2025

Aizawl the 1^st July, 2024 : Vawiin khan Mizoram Samagra Shiksha leh Tharthilthlentu (TiLi) te thawhdunna Pilot Project, ‘Project Intodelh inzirtirna’ atana chu I&PR Auditorium-ah an ziak a, School Education Minister Dr Vanlalthlana’n he hun hi a hman pui.

School Education Minister Dr. Vanlalthlana chuan he hunah hian thusawiin, ‘Project Intodelh inzirtirna’ hi School 10 ah neih a ni dawn a ti a. Kum 2008 atang daih a lo vei tawh, Entrepreneurship in Education tih paper te hial a lo ziah tawh thu te sawiin, khawvel a danglam ruala insiamrem ve thei kan nih a ngai a ni, a ti.

Minister chuan Zirlaiten nih tum hrang hrang an nei thin a, an nih tum an nih theih loh tawpah thil siam chhuah te, sumdawn te hi an hawi chauh thin a. Hei hian ngaihtuahna a ti thuiin, thlak danglam a ngaia a hriat thu a sawi bawk. Mizoram hi intodelhna kawngah nasa leh zuala kan inzirtir a tul tul thu leh hei hi zirlai kan nih lai atanga tan a tul hle a ni tih sawiin, he project tihchhin tawhna kum 2 chhungah pawh a taka a lanchian thu a sawi. Nu leh pa te’n, “Zirlai kan nih laiin lehkha kan zir that loh chuan hna i hmu lovang” an tih thin chu thlak kan tum a ni tih a sawi a. Hna hmu tur ni lova mahni intodelh tura zirlai te zirtir hi zirnain a tum a ni a ti.

Minister chuan Kan phone te a in update zung zung ang hian kan in update reng hi a tul takzet a, artificial intelligence (AI) an tih te thleng a hmang thiam chho thei turin leh thilthar a awm apianga lo hmang ve thei tur te, khawvel a vir rual kan zirlaite hi an vir ve a tul thu te a sawi. He project atang hi chuan Zirlai ten pawisa hlutna an hre leh zual dawn, nu leh pa te zahna thlengin he program hian a keng tel a ni a ti bawk.

Tharthilthlentu Chairman, Pu LTL Fela chuan ‘Project Intodelh Inzirtirna’ hian TEMC - TiLi Entrepreneurial Mindset Curriculum hnuaiah framework mumal zawk nena duan chhoh anih dan a sawifiah a. Pilot project anih hma hian Dr. Vanlalthlana MLA fund hmanga uluk taka lo kalpui tawh anih thu a sawi bawk. Hun hma lam a an lo kalpui tawh danah zirlaite chu group-ah sem darhin sumfai Rs 2000 theuh hmantir an ni a, a course inzirtir chhung zawng hian group anga thawk hovin Rs 2000 chu an peipung ho ta a ni. TEMC hian a tum ber chu zirlaite mahni intodelh nih tir a ni a, thu ringawt nilova a taka tih ngei (practical) tam thei ang ber a kawng inkawhhmuh a ni a ti.

Project Intodelh Inzirtirna atana thawhdunna turah hian Samagra Shiksha aiawhin Pu Lalsangliana, SPD in hming a ziak a, TiLi aiawhin LTL Fela'n hming a ziak a ni. He Intodelhna Inzirtirna Project hi heng school sawmah te hian kalpui ani ang: Govt. KM High School, Govt. Central High School, Govt. KVM High School, Govt. JL High School, Govt. Hrangchhunga High School, Govt. Mizo Higher Secondary School, Govt. Chaltlang Higher Secondary School, Govt. Zemabawk Higher Secondary School, Govt. Republic Higher Secondary School, leh Govt. MICE, Aizawl.

 He project hawnna program ah hian Pu Lalsangliana, State Project Director, Samagra Shiksha, Mizoram chuan inlawmna thu a sawi a, Tharthilthlentu-TiLi Chairman LTL Fela’n, Technical presentation a pe a, Pu H, Lalhruaitluanga, Addl. State Project Director (TE), Samagra Shiksha, Mizoram in lawmthu sawina hun hmangin a khar a ni. School Education a officer pawimawh tak tak te leh he project in a a tinzawn school sawm thlanchhuahte zirtirtute leh zirlaite leh sawmbik mi pawimawhte an kalkhawm a ni.