1020/2024-2025

Aizawl dated 1st July 2024: Vawiin khan Taxation Department Auditorium, Mizoram New Capital Complex-ah Central GST Commisionerate leh Taxation Department tangkawp buatsaihin ‘Strong Enterprise, Comprehensive Development’ tih thupui hmangin ‘7th GST Rising Day Celebration’ an hmang a. Dr. Vanlalthlana, Minister, Taxation Department chu khuallian niin Pu R. Zosiamliana, Commissioner of State Tax chuan hun a kaihruai a ni.

Minister Dr. Vanlalthlana chuan khawtlang leh ram tihhmasawn nan chhiah tlingkhawm chu tangkai tak a hman thin a nih thu sawiin chhiah pek ngaih pawimawh kawng ah inzirtirna uar zawk a kalpui a tul thu a sawi a. Chhiah kan pek hian keimahni tan, kan khawtlang leh ram tan a hmasawnna hna thawh nana hman thin a nih angin, chhiah lak khawmte chu chhiah petute tan bawk a hman thin a ni tih kan hriatchian hmasak a tul thu a sawi. Taxation Minister chuan Goods & Services Tax lak khawm kawngah Taxation Department-in hma a sawn zel theih nan thawktu indaih lohna phuhru turin hmalakna kalpui mek a nih thu a tarlang a. Sumdawnna hrang hrang kaltlang a awlsam zawk a Tax chhun luh a nih theih nan hmalakna kalpui mek a nih thu sawiin chhiah lakkhawm kawng a Taxation Department-a thawktute hmalakna chu lawmawm a tih thu a sawi.

Pu SM Ali, Secretary, Taxation Department chuan Taxation Department chu ram siamthat nana thawktu pawimawh tak an nih thu te, Tax pek pawimawhna leh Tax pek dan kalhmang mipuite hnen ah zirtirna an pek thin thu te sawiin GST hman tan a nih atangin chhiah tling khawm pawh a pun chhoh zel thu a sawi a. Pu Malsawmtluanga, IRS, Joint Commissioner, Central GST chuan GST kalphung leh GST hman tan a nih atanga chhiah lakkhawm dan dinhmun a tarlang bawk a ni.

Vawiin hun hmanna ah hian Taxation Department hnuai a post ruak engemaw zah awm te hnawhkhah nan hma lak mek a nih thu sawi a ni a. Chhiah lakkhawmna kawng a hna sawt zawk a thawh a nih theih nan District thenkhat a Taxation department hmunhma te pawh changtlung zawk a thawmthat tum a nih thu sawi a ni. 2023-2024 chhung a chhiah lakkhawm hi Crore 1112 vel niin GST kaltlangin Crore 970 vel lakkhawm a ni a. Tax lakkhawm zawng zawng atangin GST atang a dawn hi za zel ah 87 vel ang a chhut a ni.