3864/2024-2025

Aizawl, the 17th January, 2025: Project Pushpak Chief Engineer Pu Girish Prasad Singh chuan vawiin chawhnu khan Mizoram Governor Gen (Dr) VK Singh, PVSM, AVSM, YSM (Retd) chu Raj Bhavan-ah hmuin Mizoram chhunga Border Road Organisation (BRO) hnuaia hmalakna leh hmachhawpte a hrilhfiah. He meeting hi Mizoram hmun kilkhawr leh pawimawh tak takte thleng thei tura tun dinhmuna BRO kaltlanga kawngpui leh lei dawh mek thlen chinte inhrilhhriatna atana duan a ni.

Governor Gen (Dr) Vijay Kumar Singh, PVSM, AVSM, YSM (Retd) chuan Mizoram ang tlangram chheng chhe takah technology thar ber berte chhawr tangkai chunga hun leh senso tlem zawka inkalpawhna tha zawk siam tum turin Project Pushpak te a chah a. An project-te a hun taka zawhfel a nih theih nana harstana awmte a ranglama chinfel dan ngaihtuah zel turin a chah bawk. 

He hunah hian Pushpak Chief Engineer chuan BRO hmalaknate Powerpoint Presentation hmangin a sawifiah a. Tun thlengin Project Pushpak Mizoramin kawng 3150 Km a thui an siam zawh tawh thu leh 2392 Km chu State leh Central Agency-te kuta an hlan tawh thu a sawi a. Mizoram hmun hrang hranga kawngpui 14 an enkawl mek zinga 5 te zawhfel hnua an enkawl zui mek thu leh, 4 dangte chu Leidawh mek tih loh zawhfel a nih bakah kawngpui siam mek 5 a awm thu a sawi a. Kumin chhungin Lei 4 dawh zawhfel hman an tum thu Governor a hrilh a ni.