3863/2024-2025

Aizawl the 17th January, 2025 : Vawiin  khan Dawrpui Multipurpose Hall-ah Samagra Shiksha Mizoram BH leh Tharthilthlentu (Tili) te thawhdunna Intodelh inzirtirna inter school final 2024-2025 neih a ni.

He hunah hian khuallian Pu C. Lalbiakzauva Aizawl District Education Officer chuan fuihna thu a sawi a. Samagra Shiksha Mizoram leh Tharthilthlentu ten thawhhona neia Intodelh Inzirtirna an neih a ni chu hmasawnna a ni a ti a. Intodelh chungchangah zirlaiten chhungkaw khawsak tibuai lova anmahni tih theih ang tawk te tih na chang an hriat a tul thu a sawi.

He Project in a thil tum te puitling a nih leh rah tha tak a chhuah a beisei thu a sawi bawk. 

Intodelh inzirtirna hi Samagra Shiksha Mizoram leh Tharthilthlentu (Tili) te thawhdunna hi July 1,2024 khan bul tan a ni a, School 10 thlan chhuah te hnenah he pilot project hi kalpui a ni a, vawiin khan heng school te hian an project  phochhuakin intihsiakna hi an nei a - MICE, Govt KM HS, Govt Mizo HSS, Govt Zemabawk HSS, Govt KVM HS, Govt Hrangchhunga HS, Govt Central HS, Govt Republic HSS, Govt JL HS, Govt Chaltlang HSS te an ni.

School thlan chhuahte hnenah pawisa fai Rs 2000/- theuh pek an ni a, chumi hmang chuan an theih ang angin bul an tan a, thil zawrh turte siamin an peipung a, hlawkna an hmuh dan leh an zir chhuah te an sawifiah a ni.

Intihsiakah hian pakhatna chu MICE School, pahnihna Govt Chaltlang HSS, pathumna Govt Mizo HSS te an ni a, lawmman pakhatna hian trophy leh pawisa fai Rs 25000 a keng a, pahnihna hian medal, certificate leh pawisa fai Rs 15000 a keng a, pathumnain medal, certificate leh pawisa fai Rs 10000 a keng a ni. Presenter tha ber Mary Lallawmawmi Govt. Chaltlang HSS hnenah trophy, certificate leh Rs 5000 pek a ni bawk.

Vawiina Intodelh inzirtirna Inter School Final-ah hian Samagra Shiksha Mizoram Officer te, Tharthilthlentu (Tili) hotute, project kalpuina school zirtirtute leh zirlaite an kalkhawm a ni.