2614/2024-2025

Siaha the 21st October 2024: October Ni 18, 2024 khan Siaha RD Block huaihawtin ‘Project Rotling-Hmasawnna Rahbi Thar’ hnuaia ‘Sustainable & Holistic Development of Agri & Allied Project’ chu Siaha District-a Lobo khuaah hawnna hun hman a ni a, Pu M Misael, Project Director, DRDO Siaha chuan he hun hi a hmanpui a ni.

PD Pu M Misael chuan thu sawiin ‘Project Rotling-Hmasawnna Rahbi Thar’ chu Mizoram chhunga RD Block 28 te inelna a ni a, Short Term Project, Medium Term Project leh Long Term Project-te awmin, Mizoram chhunga RD Block 28 atangin concept paper 84 lut a lut a, chungte chu District tina a bialtu Project Director ten an endik hnuah State-Level Expert Panel in project 27 an thlang chhuak a, chuta tang chuan RD Minister kaihhruai State-Level Monitoring Committee in project 15 ah an lo thlifim leh a, chung zingah Medium term project hnuaiah Common Facility Center (CFC) at Kawlchaw East Village leh Long term project hnuaiah Sustainable and Holistic Development of Agriculture & Allied at Lobo (Lungbun) Village-te thlan a ni chu a ropui takzet, a ti. Pu M Misael chuan he project hlawhtlin theih nana khawtlang hruaitute leh mipui thawhhonaah lawmthu a sawi a, khawtlang tana rah tha leh chhenfakawm a chhuah ngei theih nan theihtawp chhuah chhunzawm zel turin a fuih bawk.

Dr Manesia Khaimeichho, BDO, Siaha RD Block pawhin thusawina a nei a, Sustainable & Holistic development of Agri & Allied Long Term Project sawifiahin chu project hlawhtlinna turin sawrkar a in hawng em em a, an mamawhnaah leh tul apiangah puih an in huam reng thu sawiin Lobo khua mipuite tan malsawmna ni se, mipuite dinhmun sang zawka khaichhuaktu ni ngei turin duhsakna a hlan a ni.

Pi FC Jenny Beirathapawngia, Technical Assistant, Siaha RD Block chuan technical report a pe a, RD Secretariat atangin Ni 14 February 2024 ah project Rotling proposal siam tura lehkha an hmuh bawkzuiin Project pathum an thehlut tih a sawi a, stage hrang hrang a endik a nih hnuah Project pahnih thlan a ni ta tih a tarlang. Sustainable and Holistic development of Agri & Allied at Lobo Project in a tum ber chu chhung tinte tan eizawnna ngelnghet siam sak a, intodelh tir tum a ni a ti. Vawiin Hawnna inkhawm hi Pu P Beirangia, VCP Lobo-1 chuan a kaihruain a, Addl Programme Officer, Pi C Galilee chuan vote of thanks sawiin hun tih tawp a ni.