2613/2024-2025

New Delhi, 21st October, 2024 : New Delhi a cham mek Rajya Sabha MP Pu K. Vanlalvena chuan inrinni liam ta khan Union Home Minister Pu Amit Shah chu a chennaah hmuin Mizoram thil pawimawh thenkhat a sawipui.

Pu Vena chuan kan thenawm ram Myanmar politics inthlak mek te Pu Amit Shah chu sawipuiin "Act East Policy" kalpui mek hnuaia Mizoram chhim lamin tuifinriat a pawhna tur kawngpui sial mek KMMTTP Road tihpuitlinna tur te, Indo- Myanmar Border Trade Centre, Zokhawthar awmze nei zawka a kal theih nan security thilah thil pawimawh sawrkar laipuiin a tih thar ngai nia a hriat te a sawipui a ni.

Pu Vena chuan Aizawl khawpui laili atanga Assam Rifles te Zokhawsanga insawn tur chungchang pawh Pu Amit Shah chu sawipuiin, he ruahmanna lo intanna chu kum 1988 ah Assam Rifles te leh mipui te inhmuhthiamlohna ah Assam Rifles ten mipui pawisawi lo mi 11lai an kahhlum avang leh mi tamtakin hliam an tawrh avang tein khawpui laili atanga AR te sawn chhuah chu civil mite nena intihbuaina a awm fo lohna tura tih makmawh nia hriaa khatih laia Chief Minister Pu Laldenga ruahmanna a nih thu Pu Amit Shah hi a hrilhfiah bawk a. Kum 36 ral hnuah pawh an la chhuak lo fo leh nikuma amah Pu Amit Shah ngei Aizawlah lokal a a rawn enfiah tawh hnuah an la insawn lo fo hi mipui ten an hriatthiam loh thu a sawi lang bawk a ni.

Pu Vena chuan Mizoram Chief Secretary ni lai Pi Renu Sharma IAS chu kumin october thla tawp a pension tawh tur a nih avangin Mizo hnahthlak zing ami, Mizo tawng thiam IAS senior Mizoram Chief Secretary ah rawn dah a tul thu Pu Amit Shah hi a sawipui bawk a ni.