No.2144/2020-2020

Vawiin chawhma khan DC Office Kolasib tual zawl atangin Covid-19 dona atan a Border Safety Monitoring team, Kolasib district hmalakna hnuaiah Project Veng YMA member 17 leh Khuangpuilam YMA member 22 te chu ramri dep a duty turin Dr H Lalthlangliana, Deputy Commissioner-in a vailiam.

Dr H Lalthlangliana chuan, hri hlauhawm tak lak a ram venghim tur a thalai thahnem tak vailiam tur an awm thin chu fakawm a tih thu sawiin, a sur a sa hnuaia ram tan a thawkchhuak tur a inpe an nih ang ngeiin an kal chhan te tha tak leh tluang tak a hlenchhuak turin a chah. Ramri veng a an riah chhuah chhung hian in enkawl uluk turin leh natna lak a inveng fimkhur thiam turin a chah bawk a ni. Kolasib DC chuan Border Safety Monitoring Team hnuaiah tun hi tum 8 an in tirh chhuahna a nih thu sawiin, Kolasib district chhungah YMA member, kum 18 atanga 40 inkar, hrisel tha tak tak mi 400 chuang ramri veng tur a inziaklut an awm thu a sawi bawk a ni.

Vawiin a ramri a duty tur a chhuak te hi ni 22.06.20 thleng an duty ang a, Project Veng YMA te hi Saihapui ‘K’ a VLTF duty-te chhawk tur niin Khuangpuilam YMA member te hi Phaisenah an duty ve thung dawn a ni. Deputy Commissioner Office, Kolasib district hnuaiah hian Border Safety Monitoring Team hi ramri a duty te thlithlai a, an mamawh te ngaihtuah sak tur a din niin Kolasib khaw chhung YMA branch hrang hrang atangin Volunteer Reserve Force-ah an inziak lut a. Anni hian a tul angin ramri dep khua Village Level Task Force te an duty chhawk thin a ni. Border Safety Monitoring team te hian ramri dep a VLTF te hi tlawh chhuak rengin, an mamawh ang hmanrua leh eitur te an pe thin a ni. Volunteer Reserve Force ang a ramri dep VLTF duty chhawk hi May ni 14, 2020 khan kalpui tan niin, Tumpui Branch YMA te duty-in an chhuak hmasa ber a, vawiin hi tum 8-na niin YMA branch 10 vailiamna a ni bawk a ni.