464/2024-2025

Kolasib dated 13th May, 2024: Vawiin chawhma khan District Urban Development Office, Kolasib, Joint VC leh Sub Hqrs. YMA Kolasib tangkawp buatsaihin ‘Project Waste Free Kolasib, 2024’ thawhhnihna atan Kolasib khawchhung a veng hrang hrangah bawlhhlawh thenfai hnatlang pui neih a ni a. Venglai, College veng leh Project veng atanga hnatlang tur chhuakte chu Parkkawn ah inhmukhawm in Kolasib DC Pu John LT Sanga chuan a vailiam.

Pu John LT Sanga, Deputy Commissioner chuan khawtlang fai leh hrisel siam tur chuan thawhhona ṭha neih a pawimawh thu sawiin kan nitin nunphung ah bawlhhlawh siam tlem zawng a khawsak thiam a ṭul thu a sawi a. Inchhungkhur kan enkawlnaah te, bawlhhlawh leh tui chhiah kan sawngbawl dan ah leh ran kan vulh dan thlengin khawtlang tan a hnawksak siam lo zawng a hma la ṭhin turin kalkhawm te a chah. Kan tlan tui hnar te humhalh leh enkawl thianghlim a ṭul thu DC chuan sawiin hemi tur hian kan bawlhhlawh leh leivung paih dan ah fimkhur lehzual a pawimawh thu a sawi a. Kolasib district chu faina kawng a hma hruaitu ni turin Sawrkar, khawtlang leh tlawmngai pawlte inlungrual tak a hma la ho zel turin a sawm bawk a ni.

Hun kaihruaitu Pu Gilbert Lalhlimpuia, DUDO chuan tehfung hrang hrang hmang a khawpui fai inelna kalpui ṭhin ah Kolasib chu a hnufual pawl an nih ṭhin thu tarlangin October thla a Cleaniness Week chhung a endikna neih leh tur ah chuan faina kawng ah hmasawnna nasa zawk a awm ngei theih nan hma lak zel tum a nih thu a sawi.

Faina hnatlang pui neih mek ah hian Kolasib Town Area chhung a Village Council hrang hrang ten khawtlang hnatlang kovin an mahni Area chhung theuh ah hma an la a. Kawng kam, Tuihawk luan kawr (Side drain) te an thian fai a ni a. ‘Project Waste Free Kolasib, 2024’ hnuai ah hian DUDO leh CZS Higher Secondary School, Kolasib tangkawpin Tuichhuahen lui hnar a bawlhhlawh thian faina an lo neih tawh bawk a ni.