Vawiin khan All India Radio, Aizawl chuan PS Chawngthu pualin I&PR Auditorium-ah Symposium a buatsaih.

He symposium a khuallian Pu C.Lalrosanga, ADG, NER AIR & DDK, Guwahati chuan AIR bultuma mimal behchhana symposium buatsaih tlemte zinga mi PS Chawngthu puala hlawhtling taka symposium buatsaih a ni chu lawmawm a ti a. A hlawhtlinna chhan chu AIR a thawktute thawhrimna piah lamah hetiang lama mi tuimite tanpuina leh tawiawmna vang a ni, a ti. AIR leh DDK chuan thu leh hla a mithiamte kutchhuak chawilar leh vawn that kawngah hma a la mek tih sawiin thangtharte ngaihthlak tlak turin record hlui tak tak digital a leh hna chu chak taka kalpui mek a ni, Pu C.Lalrosanga chuan a ti bawk.

P.S.Chawngthu hi 1922, December ni 1 ah lo piangin Mizorama zirna kawnga sulsutu pawimawh Ch.Pasena fapa a ni a. Hla chi hrang hrang, lenglawng, lengzem, khuarel thil mawite leh Pathian fakna hla thlengin a phuah vek a, a kutchhuak hla 50 zingah lengzem a tam ber a ni. Mizo Academy of Letters chuan kum 1989 khan Academy Award an hlan a, India rama civil mi te chawimawina sang tak Padma Shri in literature chu 1999 khan a dawng bawk.

PS Chawngthu - Symposium, Pu PL Liandinga kaihhruaiah hian Pu Darrokima paper buatsaih ‘PS Chawngthu leh a hlate’ zirho a ni a. PS Chawngthu pianpui unau Pu Chhuanliana bakah AIR Asst.Station Director Pu Dilip Kumar Mayengbam te chuan thu an sawi a ni.