Luangmuala Printing & Stationery Depot-ah ‘4-Hi Web Offset Machine’ bun thar chu vawiin chawhma khan Printing & Stationery Department Minister Pu C. Ngunlianchunga’n a hawng.

Pu C. Ngunlianchunga chuan khawl bun thar chu Mizoram tana bung thar, P&S Department tana mel lung pawimawh tak a ni tiin project ti hlawhtling tura sulsutute hnenah lawmthu a sawi. Minister chuan Department-a thawktute chu neitu rilru pu tur leh inthlahdah lo turin a chah a. Department dang leh mimal dawrtu hmu thei tur chuan dawr tlaka hna an thawh a tul tih hria a taima taka thawk turin a fuih a ni. P&S Department hmalakna chuan Mizoram sum leh pai dinhmun a nghawng a, kan sum neihte chu ramdanga luang chhuak lovin kan ram chhungah ngei hman a ni tawh ang tiin sawrkar a hlawk phawt chuan mipuite kan hlawk dawn a ni, a ti bawk.

Principal cum Project Manager Pu V.L. Muanchhana chuan technical report a pe a. He khawl thar hi kum 2011-a DoNER kaltlangin NLCPR sum cheng vaibelchhe 8.42 hu Strengthening of Govt. Press and Establishment of Printing Institute project hnuaia khawl chi hrang 24 zinga pakhat a ni a, khawl tam zawk chu bun fel tawh a ni. 4-Hi Web Offset Machine hi ISO 9001 certified Ronald Web Offset hminga KK Machines Company, Faridabad-te siam a ni. He Project hnuaia khawl lian ber Heidelberg SM74 pawh Germany atangin India ram lo lut tawhin Aizawl rawn pan pui mek a ni a. MBSE textbook leh Synod newsletter-te hlawhtling taka chhut chin tawh a ni bawk.

P&S Department Secretary Pu C. Thatkunga kaihhruai programme-ah hian Department tana lo thawk tawh te, Local Council leh YMA aiawhte an tel a ni.