1188/2026-2027

Aizawl the 25th June, 2026: Vawin khan Land Revenue & Settlement Department chuan Folkland Park Conference Room ah State level review meeting neiin an department hmalak mekna te leh hmathlir bakah an hnathawh kawnga harsatna hrang hrangte sutkian dan tur an sawi ho.

LR&S Minister Pu B. Lalchhanzova chuan thu sawiin, kum hnih leh a chanve chauh ama ho a an thawh ho chhungin thawktute tanrualna avangin mipui pawhin thil tha tih tum leh hmasawn tum hmuha LR&S department an hmu nia a hriat thu sawiin lawmawm a tih thu a sawi. Revenue Minister chuan LR&S Dept laka mipuiin rinna an nghaha, rinngam an nihna lantir turin amah Revenue Minister berin hma a hruai a, ama pualin ram khawi hmunah mah a in pe lo tih sawiin, a thawhpuite pawh chulamah chuan a hnung zui ngam turin a fuih.

Department hmalakna tih chak zel dan tur te, siamthatna hna kalpui mek ennawnna te leh kalphung siam that la tul awm te bakah mipui rawngbawlna kawnga district hrang hrang te harsatna tawh te ngaihthlak leh sawi hona hun siam a ni chu lawmawm a tih thu sawiin, Minister chuan State Level review meeting hi ama huna an neih vawi hnihna niin, hei hi kum tin neih thin tur a nih thu a sawi. 

Minister chuan Revenue department hi Mizoram state in ama puala sum a hmuh theihna State Own Revenue source pawimawh tak a ni a, mipui te pawh in Mizoram state in ama puala sum a thawhchhuah pawimawhna an hrethiam chho zel a,   kum kal ta a Stamps & Registration bakah  Land Tax leh Non Tax  atanga Department sum  lakluh pawh Vaibelchhe 40.23 a tling chho ta mek a, a pung chho tha hle a, heng sum te hi Mizoram Sawrkar ta liau liau, state mamawha hman tur a ni, a ti. Minister chuan Ram hlutna chhutna (Land Valuation) mumal nei turin MZU Economics Dept te thiamna hman tangkai mek a ni bawk a, tax pe lo te chhuichhuah leh umzui hna pawh online tax payment 2.0 hmangin chak taka enzui mek a ni, a ti bawk. 

Pu B. Lalchhanzova chuan mipui ten LR&S dept min mamawhna a sang chho zel a, min beisei ang diak diak la thleng phaklo mah ila, rim takin hna an thawk mek zel a ni tih hriat sak turin a ngen a ni.

Pu B.Lalchhanzova chuan LR&S department chu thawktu za zela sawmnga chauh hnawhkhah ni chunga hna thawk mek an nih thu sawiin, hnathawh tur a tam bakah, mipuiin an mamawhna a sang a; chung karah chuan technology nen tangkawp zelin, thawktute pawhin an indaihlohna  hmulian loin, mahni tawkah theihtawp chhuah theuh turin a chah bawk a ni. Revenue kaihhnawihah office leh in lamah amah hmu an tam thin thu Minister chuan a sawi a. Amah  hmuh tum tu an tlem hunah LR&S Department-in revenue reforms an kalpui mek chu a hlawhtling a tih ngam ang, Minister chuan  a ti.

Review Meeting hi LR&S Secretary Pu Vanlalmawia, IAS chuan a kaihruai a, Administrative Department bakah Directorate leh District tin Assistant Commissioner-te hnen atangin presentation ngaihthlak a ni. He one day review meeting-ah hian LR&S Department a Secretariat, Directorate leh District a thuneitute an tel kim hle a ni.