1187/2026-2027

Aizawl the 25th June 2026: Vawiin khan Chief Minister Pu Lalduhoma, Chapchar Kut Organising Committee chuan Chapchar Kut Post Souvenir 2026 a tlangzarh.

Chief Minister chuan, Chapchar Kut Souvenir tha tak kan buatsaih thin hi a fuh hle a. Hei hian Kut hlawhtling nei tura kan inbuatsaihna a tichak a, kum tam tak liam hnu pawha enlet theih thuziak leh thlalak min pe a. A rei tual tual anga a hlu tual tual dawn a ni, tiin Editorial Board chungah lawmthu a sawi a ni.

Lehkhabuah hian Aizawl leh district capital-a Chapchar Kut an hmanna te, India ram khawpui danga an hmanna te, ram pawn lama an hmanna thenkhatte report a awm a. Mizo Article 12 awmin chung zingah chuan Kut Pa, Chief Minister Pu Lalduhoma thusawi pawh ziaka dah a ni a. English section, Article 5 awmna a awm bakah Kut hmanna thlalak tha tak tak dah a ni bawk.

Souvenir tlangzarh zawh hian Organising Committee chuan kumin Kut thlirletna Committee-a an thu dah an bawhzuina report an pe a. Kut hman hun hi a tlai lutuk chuan 'Chapchar awllen lai' a hman thin Kut a nihna a tibo thei a, ruahin Kut a tibuai thei bawk si a. Chuvang chuan, March thla, Zirtawpni hmasa ber behchhana Kut hman hi a tha ber niin an ngai a, an pawm nghal a ni.

Fund Raising Committee leh tlawmngaia sponsor-tute zarah Chapchar Kut sum dinhmun pawh a tha nia tarlan a ni bawk.

Souvenir tlangzarhna inkhawm hi Pi K. Vanlalsangi, MIS, Director, I&PR chuan a kaihruai a, Dr. H. Laldinmawia, Member, Editorial Board chuan report a pe a ni.