1186/2026-2027

Dated Serchhip, the 25^th June 2026: Vawiin khan Nasha Mukt Bharat Saptah (Drug-Free Week) Serchhip Distirct a June 22 atanga hman chu a kharna hun Serchhip DC Pisapui Hall-ah hman a ni a. Serchhip District Additional Deputy Commissioner Pi Dorothy Muansangi’n hun hmanpuiin, SDO (Sadar) Pi Rebecca Laldinmawii Hrahsel-in kharna inkhawm hi a kaihruai a, Serchhip Superintendent of Police Pu Gavit Gogna bakah sawrkar department hrang hrang aiawhte, MJA leh khawtlang hruaitute he hunah hian an tel a ni.

Addl. DC Pi Dorothy Muansangi chuan thu sawiin Serchhip District-a NMBA hnuaia ruihhlo dona atana hmalakna lo neih tawh dan leh neih mek dante a sawi a. Ruihhlo do turin mipuite kan tanrual a ngaih thu leh naupang te atanga bul tan a pawimawh thu sawiin, nu leh pa leh zirtirtu ten naupangte hnenah ruihhlo that lohziate inzirtirna uar lehzuala neih a tul thu a sawi a. Mizoram chu khawvela ruihhloa sumdawnna hmunpui (Golden Triangle) bula awm a nih avangin ruihhlo do tura mipuite kan tanrual zel a pawimawh thu a sawi bawk.

Serchhip SP Gavit Gogna pawhin Serchhip Police Department te chu ruihhlo do turin engtik lai pawha an inrin reng thu sawiin nikum June 26 leh tun inkarah Serchhip district-ah ruihhlo NDPS Act hnuaiah Case 6 ziahluh tawh niin 40% te chu man an nih tawh thu a sawi a, Heroin 1.3 Kg leh Ganja 2.9 Kg zet man niin zu pawh 800 litre zet nimin maiah man a nih thu a sawi a; chak taka hmalak zel a nih theih nan Awareness programme leh thawktute intuaitharna Training pawh vawi eng emaw zat neih a nih tawh thu a sawi bawk. 

Vawiin hun hmannaah hian Election Officer Pi Lalchhanhimi   kaihhruainain Ruihhlo laka fihlim tur leh ruihhlo do na kawnga theihtawp chhuah tura intiamna/thu chham rualna neih niin Serchhip District Information & Public Relations Officer (DIPRO) Pu R. Vanneihtluanga hnen atangin Serchhip district chhunga Drug-Free Week hman dan hrang hrangte report ngaihthlak a ni. 

June 17 - 26 thleng awh tur he Nasha Mukt Bharat Saptah hi Serchhip-ah chuan June 22 - 25 chhung hian ngawrh taka hman niin, mipui punkhawmna hmunahte Awareness Campaign, Pledge leh Signature Campaign te neih a ni a, serchhip district chhunga zirna In hrang hrang 120 chuanga zirlaite hnenah ‘Ruihhlo Zunzam- Drug Awareness Film’ chhuah a ni bawk a. Counselling Session, Slogan Writing Competition, Walkathon, Yoga Meditation, Human Chains Against Drugs leh Two Wheeler Rally te he Week chhung hian neih niin mipui leh zirlai thahnem tak an tel a ni.