1185/2026-2027

Aizawl the 25th June, 2026: Nimin, June ni 24, 2026 (Nilaini) nileng khan Irrigation & Water Resources Department changtu Minister Pu PC Vanlalruata hovin IWRD Auditorium-ah “Review and Preview of Works & Assessement of Human Resources Under Irrigation & Water Resources Department” tih thupui hmangin Irrigation & Water Resources Department a thawk ten meeting an nei.

He meeting hi IWRD Secretary Er. Lalrothanga’n a kaihruai a. IWRD Department hnathawh kal lai mek ennawn a niin, Mizoram hmasawnna tura hmachhawp hrang hrangte an thlir ho a ni.

Minister Pu PC Vanlalruata chuan thu sawiin, department-a thawktute nen thawhhona tha an nei chu lawmawm a ti a, thawktu indaihlohna te a hriatpui thu leh, tun aia chak zawka thawktu lak kawngah theih tawpa hmalak zel a tum a thu a sawi. Thawktu indaih lo hle mahse, Mizoram tan leh loneitu te tan theihtawp chhuah zel turin department a thawk te Minster chuan a chah a ni.

He Review Meeting-ah hian Irrigation & Water Resources Department chuan an hna thawh mek leh hmachhawpte thawk tura thawktu dinhmun te an thlir ho a. Indaih lohna nasat avanga hun lo kal zel tura harsatna awm theite an sawi ho a ni.

Er K. Hamlet, Chief Engineer, Irrigation & Water Resources Department chuan Minister-in a tel pui theih avanga lawmthu sawiin, meeting hlawhtlinna atana hun leh tha seng zawng zawng te chungah lawmthu sawiin he meeting hi a khar a ni.