1184/2026-2027

Kolasib, 25th June, 2026: Vawiin khan DC Conference Hall, Kolasib-ah Rural Development & Administration Department, Govt. of Mizoram huaihawtin, Rashtriya Gram Swaraj Abhiyan (RGSA) hnuaiah Kolasib District chhunga Village Council thlanchhuah te hnenah Computer Set sem a ni.

He hun hi Pu Lalmuan Puia, DLAO, Kolasib chuan a kaihruai a. Khuallian, Kolasib Bawrhsap Pu H. Dolianbuaia chuan Village Council te hnenah hian Computer Set te hi a hlan a ni.

Khuallian Pu H. Dolianbuaia chuan thu sawiin, tunlai khawvel changkang zelah thiamna thar leh technology hmanga khawtlang inawpna leh rorelna (governance) kalpui chu thil tul tak a ni, a ti a. Sawrkar laipuiin RGSA kaltlanga tualchhung rorelna, Village Council te tihchak a tum chu a lawmawm hle a ni tiin, heng computer an dawnte hi khawtlang hmasawnna tur leh mipuite tana awlsam zawka hna thawh nan leh, sawrkar lehkha leh thil pawimawh (records/data) te thianghlim leh mumal taka vawn that nan tangkai taka hmang turin Village Council aiawh kalkhawmte chu a chah a ni.

Tun tumah hian Kolasib District chhunga Village Council pasarih (7) te hnenah computer set hi sem a ni a. Heng computer dawngtu khuate hi Buhchangphai, Kolasib Venglai, North Chaltlang-I, Phainuam, Rengtekawn, Saihapui 'V' leh Vairengte-II te an ni.

Khuallian thusawi zawh hian duh apiangte tan thu sawina hun hawn a ni a, hemi hnu hian thutkhawm kaihruaitu Chairman hnen atangin lawmthu sawina  ngaihthlak a ni.