Vawiin khan Kolasib District huam chhunga sawrkar laipui bultuma thingtlang hmasawnna scheme leh programme hrang hrang kalpui mekte ennawn leh thlithlaia, an thlen tawh chin leh harsatna an tawhte sawiho turin District Level Vigilance & Monitoring Committee, Kolasib District chu Chairman Lok Sabha MP Pu C. L. Ruala leh Co-Chairman Rajya Sabha MP Pu Ronald Sapa Tlau hovin Kolasib DC Conference Hall-ah an thukhawm a. He meeting ah hian Parliamentary Secretary Pu Hmingdailova Khiangte; Parliamentary Secretary Pu K. Lalrinthanga; Kolasib Assembly bialtu MLA Pu PC Zoram Sangliana; Committee Member Secretary leh Kolasib DC ni bawk Pu H. Lalengmawia bakah District Rural Development Agency (DRDA) Kolasib, Project Director leh a thawhpui te leh Kolasib District a Centrally Sponsored Schemes (CSS) kalpuitu Line Department hrang hrang aiawhte an tel bawk a ni.

Hemi rual hian District Health Committee; District Education Committee; District Swacch Bharat (Urban) Committee leh District Electricity Committee te pawh vawiin vek khan MP pahnih leh MLA pathum hovin an thukhawm nghal bawk a ni.

Pu CL Ruala chuan District Level Vigilance & Monitoring Committee leh District Level Committee dangte hi an pawimawh a, heng Committee te kaltlang hian hmasawnna leh mipui rawngbawlna kawnga Department te hma lak dan, ke an pen dan leh an harsatna te kan hre thei a, duhthawh lohna laite a kan in khak theiin kan tihthatnaah te kan in fak thei a, harsatna awmte sutkian nan a sawina tur hmunah heng harsatna te hi kan sawi thei a, chuvangin Department tin te hian heng meeting te hi ngaipawimawh leh zual turin ka chah duh che u, a ti a. Pu Ronald Sapa Tlau chuan Sawrkar hnathawk te chu hmasawnna kawnga mipuite ke pen pui tur atana awm an ni tih hre renga theitawp chhuaha mirethei leh mi harsa zawk ten hmasawnna an neih theih zel nan inpekna thar nen an hna thawk turin a fuih a. Kolasib District chhungah nikum chhungin sikserh avanga boral pakhat chauh an awm leh kumin April ni 1 thlenga sikserh avanga boral an awm lo leh District-a nausen pianghlim thi zat tehfung, Infant Mortality Rate in tlakhniamna lam a pan zel chu lawmawm a tih thusawiin inthlahdah hauh lova, an hnathawh ropui midangte nunna chhanhim chu ngawrh taka thawk zel turin a fuih bawk a ni.

Vawiina District Level Vigilance & Monitoring Committee ah hian thingtlang tihhmasawn nan leh a chengte chawikanna atana sawrkar laipui scheme hrang hrang hnuaia hnathawh leh hmalak dan, sum an hmuh hman dan te chipchiar taka thlir hoin harsatna thenkhat awmte chu a kalpuitu Department aiawhte leh he Committee Member ten tarlangin chung harsatna te chu an sawiho a ni.

District Health Committee thutkhawmnaah hian hriselna kawnga Kolasib dinhmun leh an hmalakna te chu CMO in a tarlang a. 2016 January-April chhung hian nausen piang 431 an awm a, nausen thi a piang(still birth) 4 an awm a, raicheha thi an awm lo thung. Hemi hun chhung hian Kolasib damdawiina in admit Case 2281 leh OPD a inentir Case 19711 an nei a. Hemi hun chhung hian thisen test mi 1400 atangin HIV hrik pai mi 63 (mipa 52 leh hmeichhia 11) an hmuchhuak a. School hrang hrang Outreach programme vawi 70 leh khaw hrang hranga Mobile Medical Unit vawi 18 lai an intirchhuak a ni. Health Worker lamah indaih lohna an neih thu meeting ah hian an tarlang bawk a ni.

District Education Committee meeting ah hian HSLC leh HSSLC result te tarlan a ni a. HLSC 2016 result ah hian pass percentage hi 63 percent a ni a, HSSLC (Arts) ah 82.3 percent leh HSSLC(Science) ah pass percentage hi 87.1 a ni a. MP leh MLA te hian HSLC pass percentage tlem chu an ngaimawh thu sawilangin DEO in he thil hi zirchiang turin an hrilh a. Zirtirtu ten B.Ed. training an kal chhunga, aiawh tur an awm thin loh avangin zirna in a tuar thei thu meeting ah hian sawi lan a ni a. Clean School Movement huaihawt tan anih thu leh School tinah inthiarna enkawlna atana Toilet Maintenance Grant cheng 1400 pek a nih thu te tarlan a ni a. RMSA hmalakna pawh meeting in an thlir ho bawk a ni.

District Swacch Bharat (Urban) Committee meeting ah hian January leh May 2106 inkara Saidan, Rengtekawn leh Gosen Vengah te inthiarna mumal nei lo tan ek in 45 an sak sak thu leh bawlhhlawh paihna mumal tak Solid Waste Management Centre chu Dihmun tlangah buatsaih mek anih thu te an tarlang a ni. Housing for All bultanna ngawrh taka an kalpui mek thu DUDO in a sawi bawk a ni.

Kolasib District ah hian job card nei 17817 an awm mek a. Sawrkar kum kalta(2015-16) khan MGNREGS hnuaia hian ni 78 inhlawhna siam a ni.

District Electricity Committee meeting ah hian Deendayal Upadhyaya Gram Jyoti Yojana (DDUGY) hnuaia Kolasib District chhunga P& E Department hma lakna te chu an thlir ho bawk a ni.