Pu C.L Ruala MP ( Lok Sabha) chuan ni 14^th Sept 2009 hian Mamit khua a tlawh a, Tourist Lodge-ah Sorkar mi pawimawh leh Party hruaitu ten an lo hmuak a ni.

Amah lo hmuahna inkhawm I&PR Conference Hall-a buatsaih, Pu P.C Lalthanzuala President, Block Congress kaihhruaiah thu sawiin Mizoram tana hmasawnna hna thawkthei tura siamtu Pathian leh mipuite hnenah lawmthu a sawi a, Mizoram hian hmasawnna kawl eng a hmachhawn mek a ni tiin Leihnuai hausakna haichhuak turin ONGC ten tunah hian hna an thawk mek a ni a ti a, chubakah Central atangin mirethei dawmchhuahna tur Scheme hrang hrang kan dawng hnem hle a, hei hi tangkai tak leh dik taka kan hman a tul a, NREGS kaltlanga mirethei inhlawhna a kan hna thawh dan han en hian kan that chhiat phah ka hlau a ni a ti a. Mipuite kan hnathawhah khawtlang tana rotling siam thei turin taima leh rinawm takin hna thawk turin amah lo hmuak tute a chah a ni.

MP chuan khawtlang hruaitu ten District leh khawtlang tana an mamawh a hnena an thlen te a theih ang anga lo bawhzui pui a tiam a ni.

MP tawiawmtu Pu John Rotluangliana, MLA, Deputy Speaker leh Pu Lalrobiaka MLA, Chairman ZIDCO ten thu an sawi bawk a ni.