Mizoram sorkar leh RGICL ten nikum lama inremsiamna an lo neih angin sorkar hnathawk lo, Mizoram khua leh tuiten natna an tawh a, an inenkawlna senso rulh nan Mizoram sorkar chuan RGICL hnenah hian Rs. 27,49,18,783/- a dah lawk a. Heta tang hian Reliance chuan damlote inenkawlna man hi cheng vaibelchhe 8.6 vel a pe chhuak tawh a. Nikum November thla atang khan Reliance company hian sum a rawn pek chhuah hi titawpin private hospital hrang hranga leiba tling khawm hi vaibelchhe 4.2 vel a tling tawh a. Sorkar hospitala leiba pawh nikum September thla thleng khan vaibelchhe 8 aia tam a tling khawm tawh bawk a ni.
Hetianga Reliance in thla 3 zet sum a chelh khawtlai avanga private hospital neitute leh damlo ten harsatna namen lo an tawh mek chu he meeting ah hian sawi chhuah a ni a. Hospital ten harsatna an tawh zingah damlote inenkawlna bill, chhan leh vang mumal awm lova Reliance-in thahnem tak a rawn paih then sak thin te, cashless facility hmanga a thlawna damlote enkawl phalna, (pre-authorization) leh an inenkawlna tur zat sum bituk phal belh sakna (enhancement) chungchang te, inrawn tlanna awm lova cashless facility tihtawp te, Hepatitis natna veite enkawlna senso rulhsak chungchangte sawi chhuah a ni a. Mizoram sorkar aiawhte leh private hospital neitute chuan RGICL chu Mizoram sorkar nena an inremna anga thil ti tluantling lovah an ngaih thu leh he scheme enkawl tura rawih Mediossist ten Aizawl ah office hawnga, damlote bill ni 7 chhunga chingfel zel tura an intiamna chu an bawhchhiat vanga hetiang harsatna hi lo thleng nia an hriat thu he meetingah hian an sawi chhuak a. Damlote bill November thla atanga an pek tawh loh chu RGICL chuan chhuanlam siam lovin a vaia rawn pe chhuak thuai tur leh thil dik tawk lo awm nia an hriat chu hospital hrang hrang ten englai pawha enfiah an inhuamin diklo a lo awm a nih chuan siam that an inpeih reng tih an sawi.
Minister sawmna angin RGICL aiawha lo kal Samiran Guha, Regional Head, RGICL Guwahati leh Shamita Paul, Zonal Head, Mediossist Kolkota te chuan an dinhmun sawifiahin damlote bill tam takah dik tawklo leh document fello te hmuh chhuah a nih avangin bill te hi enfiah mek a ni, an ti a. Insurance policy dan anga thil an kalpui thu leh February thla chawlhkar hmasa ber atanga sum pe chhuak leh turin hma lak mek a ni, tih an sawi a.
Mizoram sorkar aiawha tel Pu J.C.Ramthanga Commissioner, Health department chuan Mizoram Health Care Scheme chu mipui tana scheme chhawr nahawm leh tha tak a ni tiin he scheme atan hian Mizoram sorkar chuan RGICL chu inrintawnna boruak tha tak hnuaiah thawk dun turin thu a thlun pui a. Chhuanlam eng eng emaw siama RGICL chuan thil ti khawtlai lo tur leh he scheme hi mipuiin an chhawr theihna tur dal lova a tira an kalpui anga tha taka kalpui chhunzawm turin RIGCL aiawhte chu a ngen a ni.
Darkar thum lai sawiho a nih hnuah meeting kharna thu sawiin Pu Rinliana chuan Mizoram Health Care Scheme chu mipui leh RGICL lam pawhin an hlawkpui ve ve a duh tih a sawi a. Hemi rual hian RGICL chuan a sum batte chu mipuiin harsatna an tawh belh loh nan rawn pe tla thuai se a duh tih sawiin a tul a nih chuan amah leh he meetinga tel ve, Parliamentary Secretary (Health) Pu S.Laldingliana hovin hospital hrang hrang te chu tlawh chhuaka thil diklo a lo awm a nih chuan enfiah turin a inhuam tih a sawi a. He meeting atang hian harsatna tam tak chu chinfel a ni ngei ang tih a beisei thu a tarlang bawk a ni.
