Nimin khan State Agricultural Management & Extension Training Institute (SAMETI) leh Mizoram State Bio-Diversity Board tangkawpin ni thum awh tur "Capacity Building Workshop for Stakeholders in Mainstreaming Agro-Biodiversity" chu  Kolasib District Bio-Diversity Management Committee Members te tan  SAMETI Training Hall, Aizawlah Training buatsaih a ni.

He training hawnna a khuallian, Agriculture Minister Pu C. Lalrinsanga, Agriculture Minister chuan SAMETI in Kolasib District Bio-Diversity Management Committee Members te tana hetiang training an buatsaih thei hi a lawmawm a ti hle a, Kan chenna khawvel hi keini a chhunga cheng mihringte hi a ti chhe tu kan ni a, kan ram ro hlu thing leh mau, nungcha te hi a ti remtu kan ni a, hei hian kan sik leh sa hi a thlak dang lam nasa a, kan tualto thlai te hi a chi a mang mek a, a chi nei let leh a ching uar thar turin tan kan lak a ngaih thu a sawi a.

Minister chuan Mizote hi a tam zawk lonei-a eizawng kan ni a, kumtina loneihna hmun sawn bansana, huan/lo hmun nghet nei a kan eizawn dan hi thlak a tul thu a sawi a, Kan ram a thing leh mau, nungchate hi kum tin hian a tlem tial tial a, lei chung hangte hi kum tin a luang ral nasa em em a, kan ram thil hlu kan neihte ti chhetu ni lo a, tun aia ching uar zawk tur in kal khawm te a chah a. Heng Bio-Diversity Management Committee (BMC) Forum hi Mizoram pumah changtlung taka din a, tangkai leh chak taka hma la turin a chah bawk a ni.

Training hawnna hun hi Pu R.K. Nithanga, Director, SAMETI in a kaihruaia. Pu Liandawla, IFS, PCCF & Member Secretary (Mizoram State Biodiversity Board) in keynote address a pe a, Dr Baby Zaithanpuii Hmar, Project Coordinator in lawmthu sawiin a hawnna hun hi hman a ni.

He training hi Food and Agriculture Organisation (FAO) - Technical Coordination Project (TCP) "Strengthening Agriculture & Allied Sector Contributions to India's National Biodiversity Action Plan (NBAP) and National Biodiversity Targets (NBTs)" hnuai a SAMETI leh FAO, India Agreement an ziah anga kal pui a ni.