No.3196/2021-2022
Aizawl, 29th November, 2021 :Vawiin khan Pu C. Lalrinsanga, Hon'ble Minister, Agriculture, Irrigation & Water Resources, Cooperation, etc., chuan Thenzawl Dragon Fruit Growers & Marketing Society member chhungkaw 59 leh mimal 3 ten dragon fruit an chinna hmun a tlawh a. An hmunhmate chipchiar taka fangin an mamawh te a enpui.

Dragon Fruit chingtute nena inkawm honaah Minister chuan, an thawmrimnaah lawmthu hrilhin an mamawhte chu theihtawpin a ngaihtuah sak dawn tih a hrilh a. Tuilak tur a awm phawt chuan a lo harsa deuh anih pawhin tihtheih ngei kan tum dawn a. Hei leh chen hi rim takin in lo thawk tawh a, sawrkar chuan a umzui sak ngei ngei dawn cheu a ni. In hmalakna ropui tak ka hmuh hian inthlakthlengna ropui tak a thleng dawn niin ka hria. Hun harsate chu lo thleng thin mahse a rei ngai lova, mi tumruhte chuan an paltlang zel thin a ni tih i hrereng ang u, tiin dragon fruit chingtute chu a fuih a ni. Huan thlai kan enkawl dante tunlai zawk leh mumal zawka kan kalpui chhoh zel a tul tih sawiin, kan sum lakluhte atanga kan thlaite enkawl letlehna lam kan uar deuh deuh a tul hle a ni, a ti bawk. Pu C. Lalrinsanga hian sawrkarin loneitute tana hmalakna lian tak tak an neih thu sawiin, kan mamawh em em leitha siamna din tum mek a nih thute, bio pesticides siamchhuahna tur Bio- Control Laboratory te, thlai thar sawngbawlna lamte, marketing mumal zawkte neih tumin hmalak mek a nih thu a tarlang a ni.

Thenzawl Dragon Fruits Growers & Marketing Society Secretary Pu Lalruatsanga Pautu chuan report a pe a. An member te hi Missions for Integrated Horticulture Development hmangin mi 11, FOCUS hmangin mi 28 leh SEDP atangin mi 20 te tanpui niin an vaiin mi 59 an ni a. Society dinin registration pawh an nei fel tawh a ni. An dragon fruits chinna hmun hi Sathlur tlang dung, tun hmaa Sialsuk leh Thenzawl inkar kawngpui hluiin a paltlang ramah niin a bul tan nan an member chhungkaw 59 ten dragon fruits ban 200 theuh leh mimal chhungkaw thum ten ban 200 theuh, a vaiin unit 62, dragon fruits ban 12000, kung 36000 an phun a ni. Zau panga inhnaih tak siah an inzarpharh a ni. Society member te hian ban 400 tal neih vek theih beiseiin sawrkarah dilna an thlen mek a, ban 400 chin hi chhungkaw chawmna leh eizawn nana tlinga ngaih a ni a. Ban pakhatah hian dragon fruits hi kung 3 zel an lawn tir a ni. Tin, society te hian Minister hnenah hian a panna kawng chungchangte, tuilakte, Electric lakluh te, beneficiary tihbelh te, processing lamte leh an mamawh dangte an lo thlen a ni.

Sawrkar chuan MIDH, FOCUS leh SEDP atangte hian Society member tinte hi Cement ban 200 siamna tur Rs. 60,000 theuh pein, Spayer te, leitha chi hrang hrangte, Kutkawr leh cutter te an pe tawh a. A panna kawng an thawh tawh chin pawh sanction tihchhuah tawh niin, tuilakna tha an neih theih nan Irrigation Survey tlangpui pawh neih a ni tawh a ni.

Minister hi Prof. F. Lalnunmawia, MLA & Vice Chairman, Horticulture Development Board, Dr. ZR Thiamsanga, MLA, Vice Chairman, Health & Family Welfare Board, Pu. Rochhunga Ralte, Ex- MLA, Vice Chairman, Land Revenue & Survey Board, Er. Lalrotluanga, CE, Irrigation & Water Resources, Pu James Lalsiamliana, Addl. Director, Agriculture, Pu RK Nithanga, SPD, FOCUS, Pu CH Lalmuanpuia, Jt. Director, Horticulture te leh official dangten an tawiawm a. Serchhip atangin Pi M. Vanlalzami, DHO, Pu Tlangtimawia Zote, DAO leh official dangte leh Thenzawl khawtlang hruaitute an tel a ni.

Attachment

  • Loading attachment...