Tun inrinni, dt 12.11.16 khan Minister of State for AH & Vety Pu C. Ngunlianchunga hovin Serchhip District MJA member te leh MJA General Headquarters hotu engemawzat ten Thenzawla AH & Vety Farm an tlawh a, tun hnaia Farm in hma a sawnna hrang hrangte an thlir hova. Minister hi Pi Vanlalawmpuii Chawngthu, MLA leh Mizoram Women Commission Chairman ni bawkin a tawi awm.

Pu C. Ngunlianchunga chuan, kan ramah sa, artui leh bawnghnute tharchhuah tipunga, kan mamawh khawp em kan thar mai lo a nih pawha kan mamawh tam zawk tal tharchhuah a nih theih nan AH & Vety Department chuan hma a lak chhoh zel thu a sawi a. Thenzawl Farm bikah pawh Bawng vulh mek a nih thute, Vawk No tharchhuahna tur buaipui mek a nih thute, Ar (Rainbow Rooster) a sa ei chi leh tui tir chi vulh pun mek a nih thute, ran chawtha (food Supplement) Azolla enchhin mek a nih thute, tha taka ranchaw siam chhuah reng a nih thu leh hralhchhuah reng a nih thute, Farm ram chu thal lai pawha a hrin reng theihnan tuikhuah 7 siam a nih thute, ran chaw upna, nakin lawka ran vulhtuten bottle refilling system anga an lei theih mai tawh turte, ran chaw atana tha bik Vaimim, African Toll chawkluh a nih tur thute, Kel lian chu Farm lian siam tuma hmalak tan a nih tawh thute, Changpat Leitha siamna hmunpui din tura hmalak mek a nih thute a tarlang a. Thenzawl chu Vantawng khawhthla, Tuirihuai leh Deer Park awmna a nih bawk avangin chungte ngaihtuah tela Thenzawl Vety Farm chu Eco Tourism hmunpui ang thei tura duan chhuah an tum thute leh chumi atana Sakawr lian chi NEDP atanga engemawzat vulh tan tum a nih thu leh an dila Lawng awmsa bakah a dang dah belh an tum thu a sawi bawk. Minister chuan, ram chhung hmun hrang hranga AH & Vety Department hmalakna pawh sawi langin, heng hmasawnna an neih theih nan hian chuti teh vakin sum an heh loh thu leh, a awm chhun ren tak leh tangkai taka an hman thin thu a sawi bawk.

Minister tawiawmtu, AH & Vety Director, Dr. Saingura pawhin thu sawiin, sawrkar ruahmanna tha tak leh thawktute inpekna avanga AH & Vety Department in hma an sawn nasat thu a sawi a. Thenzawl Farm leh Mampui Farm te tihchangtlunna tur ruahmanna awmsa engemawzat a awm thu sawiin, chutihlaiin Thenzawl Farm ram, mi thenkhatin an lo ita, chhuhsak dan an zawng ru thin chu pawi a tih thu a sawi a. Thenzawl Vety Farm chu dan ang taka neih, tha taka chhiah pek reng a ni a. Kan roh hle a ni, a ti bawk.

Farm chhunga Department hmalakna hrang hrangte an tlawh hnuin Farm Rest House tualah inkawm hona hun hman zui nghal a ni a, he hunah hian Chanchinbumiten an hriatchian duh leh hmalak chhoh zel atana an it zawngte an sawi lang hlawm a. Department hmalakna hrang hrangah lawmthu an sawi bawk. Heng an zawhna leh an rawtna te hi Department Officers te bakah Farm enkawltu Manager leh Doctor ten an chhang hlawm a ni. Inkawm hona an neih zawh hian zanriah kilhona hun an hmang nghal bawk.

MJA ten Vety Farm an tlawhnaah hian Serchhip District atangin chanchinbumi 13 leh Aizawl lam atangin mi 8, an vaiin mi 21 an kal a. AH & Vety Director Dr. Saingura bakah Officer dang, Dr. Varte, Deputy Director (Epidemiology) Dr. Lalhmingthanga, General Manager, Thenzawl Farm, Dr. Engkunga, Chhangte, Sr. Vety Officer, Dr. V. Lalzarzova, Vety Officer (Feed Mill) Dr. leh Thenzawl Farm a hmuna enkawltu Dr. Lalmuanpuia Samte, Manager leh Dr. Amos Vanlalhruaia, Manager leh thawktu dangte an tel bawk a ni.