Nimin ni 11 khan AH & Vety Minister Pu C.Ngunlianchunga chuan a Bial Lawngtlai West huamchhung khaw thenkhata hmasawnna hnathawh mekte tlawhin a en.

Minister Pu C. Ngunlianchunga hian Kawrthindeng bula Chhimtuipui Balu lakna tur kawng BADP sum cheng nuaih 55 hmanga laih mek chu a en a, he kawng hi Km 7 a thui tur niin Kawrthindeng khua atanga Chhimtuipui panna tur ani. Hnathawktuten January thla chhunga thawh zawh hman an in beisei thu Minister hi an lo hrilh. Hemi hnu hian Kawnrthindeng khuaa MP leh MLA Fund cheng Nuaih 4 senga laih tur Playground a en nghal bawk. Ministerin Kawrthindenga hmasawnna hnathawh a en zawh hian Hmarluang atanga Hlimzawl Medium Truck Road laih mek chu a en leh a, he kawng laih mek hi BRGF Sum cheng nuaih 30 hmanga thawh mek a ni. Hlimzawl khua ah hian Motor a la lut ngai lova, he kawng laih zawh anih chuan Motor pawh a lut ve thei tawh dawn a ni. AH & Vety Minister hian Nghalimlui khaw Tuilakna leh Khelmual laih tur pawh a tlawh nghal a, Nghalimlui khua chawm tur tui lakna BRGF Sum cheng nuaih 10 senna turah hian mamawh tawk pipe dah vek tawh niin chak taka hnathawh chhoh zel tum a nih thu Department hotuten an lo hrilh a ni.

Minister chuan sawrkar hmalakna zarah hmasawnna hmel duhawm tak tak kan hmu chho zel a, heng kan hnathawh mekte kan phak tawka a tha thei ang ber zeal kan thawh loh chuan hun reiloteah harsatna dang min siam theitu an ni a, chuvang chuan thawktute chu inpe tak leh taima taka thawk turin ka ngen che u a ni, tiin hnathawktute hi a fuih a ni.

Minister Pu C.Ngunlianchunga hi LADC-a bialtu Executive Members te, Lawngtlai BDO leh PHE SDO ten an tawiawm a ni.