Vawiin khan Kolasib District huamchhunga sawrkar laipui bultum thingtlanga hmasawnna scheme leh programme hrang hrang kalpui mekte ennawn leh thlithlaia, an thlen tawh chin leh harsatna an tawhte sawiho turin District Vigilance & Monitoring Committee, Kolasib District chu Chairman Lok Sabha MP Pu C.L. Ruala hovin Kolasib DC Conference Hall-ah an thukhawm a. He meeting ah hian Parliamentary Secretary Pu Hmingdailova Khiangte; Committee Member Secretary leh Kolasib DC ni bawk Pu H. Lalengmawia bakah District Rural Development Agency (DRDA) Kolasib, Project Director leh a thawhpui te leh Kolasib District a Centrally Sponsored Schemes (CSS) kalpuitu Line Department hrang hrang aiawhte an tel bawk a ni.

Lok Sabha MP Pu C.L. Ruala chuan District Level Vigilance and Monitoring Committee in hetianga hmasawnna hna kalpui mekte a enpui leh a vilpui rualin Sawrkar Laipui pawhin an mahni hrilhlawk lem lovin hmasawnna hna kalpui mekte enchiang turin mi a tir thin a, an hmuh dan report chu MP te hnenah an pek ve thin thu a sawi a. An hmuh dan chuan Mizoram hian kan ti chhe lem lova, kan tichhiatna aiin kan tih thatna an hmu tam zawk a. Tun aia nasa leh zawka inpekna thar nen kan thawh chuan a ti tha berte zing ami kan ni theiin ka hria, a ti a. Sawrkar hnathawk te chu hmasawnna kawnga mipuite ke pen pui tur atan a awm a ni tih hre renga theitawp chhuaha mirethei leh mi harsa zawk ten hmasawnna an neih theih zel nan inpekna thar nen an hna thawk turin a fuih a. Kolasib DC-in kawng hrang hranga hmasawnna atana a inpekna leh hma a lakpuina te chu lawmawm a tih thu MP hian a sawi bawk.

Kolasib DC Pu H. Lalengmawia chuan Vigilance & Monitoring meeting chu meeting pawimawh tak, kan hma lak tawhna te enletna leh kan hnathawh te a huhova kan sawihona hun a ni a, chuvangin langtlang taka thil awm dante kan sawi leh thlir ho a pawimawh a ni, a ti a. Hmasawnna kawnga CSR hman tangkai dan dap thiam a tul thusawiin hemi atan hian a bik taka hma lak a tum thu a sawi bawk.

Vawiina District Level Vigilance & Monitoring Committee ah hian thingtlang tihhmasawn nan leh a chengte chawikanna atana sawrkar laipui scheme hrang hrang hnuaia hnathawh leh hmalak dan, sum an hmuh hman dan te chipchiar taka thlir hoin harsatna thenkhat awmte chu a kalpuitu Department aiawhte leh he Committee Member ten tarlangin chung harsatna te chu an sawiho a ni.

Meeting-ah hian hriselna kawnga Kolasib dinhmun leh an hmalakna te chu CMO leh DMS Kolasib aiawhte chuan a tarlang a. 2015 October-December quarter-ah nausen piang 130 an awm a, damdawiina nausen thi 2 leh thi a piang(still birth) pakhat a awm a, raicheha thi an awm lova. Hemi quarter chhung hian Kolasib damdawiina in admit Case 946 leh OPD a inentir Case 7437 an nei a. Blood Donation Camp tum nga lai an buatsaihin thisen unit 186 (voluntary 163 leh replacement 23) an lakhawm a. Heng zinga unit 113 chu mi harsa zawk te tan a thlawnin an pe a ni. Hemi hun chhung vek hian malaria vanga boral an awm lova. Vaccine pekna kawnga Vaccine Session Held chu za zela 98.5 an thawk a. Meeting ah hian damdawiin bawlhhlawh halralna Incinerator chungchanga harsatna an tawh chu an tarlang bawk. RMSA Kolasib hnuaiah tun thlengin sawrkar high sikul 13 sak that a ni tawh a, RMSA in khaw 11 ah sikul thar an sa zo tawh a, Zanlawn RMSA School chu sak mek a ni bawk. Major Repair atan Hortoki, Nisapui leh Bairabi a Sawrkar High Sikul ah te cheng nuai 7.63 ruahman a ni a. Tun thla tawpah English leh Social Science zirtirtu te tan training an buatsaih tur thu leh SMDC tan February thlaah Community Training 2nd Phase an buatsaih tur thu an tarlang bawk a. SSA Kolasib chuan sikul kai lo naupang 322 an chhinchhiah tan special course pe in zirna an kalpui mek a. Vohbik naupang 529 chhinchhiah zinga 517 te chuan sikul an kai mek bawk a ni.

PHE Department chuan Swacch Bharat Mission (Rural) hnuaia inthiarna nei lo te tan ek in an sak sak mek a, Khamrang, Mualkhang, Meidum leh Saihapui K ah te ek in 79 an sa tawh a. Kolasib District a khaw 20 te chu pawna daileng awm lohna Open Free Defecation khuaa puan an ni tawhin hengte hi State Level Committee in an la thlir leh dawn a, khaw 20 dang pawh kumin chhungah hian hetianga puan tum a ni.

District Urban Development & Poverty Allevation Office, Kolasib chuan NULM hnuaia khawpui mirethei thiamthil siamsak/tihpun kawngah beneficiaries 194 tan eizawnna kawng hawi lam training an buatsaihin a second phase ah beneficiaries 130 te chu tunah hian training neihpui mek a ni.

Kolasib District ah hian job card nei 17749 an awm mek a. Tun sawrkar kum kal lai mekah MGNREGS hnuaiah hian ni 37 inhlawhna siamsak an ni tawh.

Vawiin khan District Vigilance & Monitoring Committee rualin District Electricity Committee pawh an thukhawm nghal a. Deendayal Upadhyaya Gram Jyoti Yojana (DDUGY) hnuaia Kolasib District chhunga P&E Department hma lak tumna te chu thlirin Feeder Separation, Metering leh System Strengthening atana XII Plan hnuaia sum ruahman nuai 642.83 chu an pawmpui a ni.