Vawiin ah khan Mizoram Governor Lt.Gen(Rtd.) Nirbhay Sharma leh a nupui Pi Jyotsna Sharma te chuan Chawngte khawpui leh Tlabung khua te Airforce Helicopter hmanga tlawh in chawhnu her ah khan Aizawl ah an rawn kir leh nghal.

Governor hi Minister of State Dr.B.D. Chakma, Secretary to Governor Pu Rodney L. Ralte, Brig. Uday Pathania, DIG, BSF leh Official ten an zui a. CADC Rest House kawt tual, Chawngte ah CADC hotuten Governor pual hian vantlang inkhawm an lo buatsaih a. CEM a awm loh lai a nih avangin Pu Susen Chakma, Acting CEM, CADC in Khuallian lawmna thu sawiin Pu Dayal Chandra Chakma, Chairman, CADC in programme hi a kaihruai thung a ni. Vantlang inkhawm neih zawh ah hian CADC huam chhunga NGO te leh Political Party hrang hrang ten Governor chu kawm leh in he hunah hian harsatna te bakah an ngaih pawimawh zawng te an lo hrilh a ni.

Chawngte mipui leh Official te hma ah thusawiin Governor chuan Border Area te theihtawpa tih hmasawn a nih theih nan sawrkar in nasa takin tan a la mek a ni a ti a. Border Security Force, ramri hrula inkulh te pawh in ramri venhimna bakah an awmna bula chengte tanpui leh tih hmasawnna kawng ah mawhphurhna an nei tih a tarlang. Chawngte khaw mipui leh CADC area chhunga awm te chuan hmun kil khawr bera awm zia rang leh rilru pu lo turin a ngen a. CADC leh Mizoram sawrkar ah thalai hna hmu lo zawng zawng thawh tur hna a awm loh avangin kawng dang dap tumna rilru CADC area chhunga thalai ten an neih a ngai a ni a ti a. CADC pawh in a thuneihna huam chhunga thalai te tan Skill Training lamah ke rawn pen chhuak se, mi tam tak tak eizawnna kawng hawngtu a ni ngei ang a ti.

Tlabung ah 166 Bn BSF Company Headquarters tlawh leh in he Border Outpost(BOP) ah hian Official te leh BSF sipai ten an lo hmuak a. BSF Commandant te chuan Bangladesh ramri venhim hna an thawh dan tlangpui te hrilh in ruahmanna tha zawk nia an rin te an lo hrilh a. Governor chuan an harsatna leh an hmachhawp te lo enfiah tiam in khawtual mi ten en lungrual leh inpawh tak chunga ramri ven him hna thawk dun turin a fuih a. BSF sipai te chu an thawhrimna avanga ram a rualmuan thu hrilh in an awmna hmun chu hmun hrehawm ah ngai mai lova hmun pawimawh, ramchhung ralmuanna tana venhim ngai lai ni zawk a hre turin a ngen a ni.

CADC report in a tarlan dan chuan CADC chhunga mihring chengzat chu 53,057 ni in heng zinga 38.23% te hi ziak leh chhiar thiam an ni a. Sawrkar office lian leh tenau awm zawng zawng chu 59 a ni a. Zirna in 144, Bank 2, Dak in lian leh te 9 a awm bawk a. CADC huam chhungah hian alkatra luan kawngpui 42 Km awm in thal lai a hman theih kawngpui 164 Km a awm bawk a ni.