Vawiin khan Sports Minister Pu Zodintluanga leh Mizoram Football Association (MFA) President, Health Minister ni bawk Pu Lal Thanzara te chuan Mualpuia Rajiv Gandhi Stadium an tlawh a. Mizoram sawrkara PWD official-te, police hotute, Mizoram Football Association aiawhte leh Aizawl FC thuneitute nen vawiin hian Stadium-a VIP lounge-ah MFA President Pu Lal Thanzara kaihhruaiin joint meeting pawimawh tak an nei zui nghal a ni.
Mizoramah a vawikhatna atan India rama football league sang ber I-League chu January 16, 2016, Inrinni hian khelh a lo ni dawn ta a. Heta tan hian inbuatsaihna ngawrh taka kalpui mek a ni a, stadium pawh I-League dawng tur hian peih fel a ni tawh. Minister pahnih hian a hmunhma fangin inbuatsaihna kal mek an enpui a. Footballer te, official te leh entu mipuite venhimna leh hriselna chungchang te, traffic leh parking chungchang te, disaster management, mikhual dawn sawn dan tur te leh a hmunhma tihfai dan tur te thlengin vawiin meeting-ah hian sawiho a ni.
Sports Minister Pu Zodintluanga chuan I-League match hmasaber thleng tur kan nih avangin sawrkar, MFA, Club leh mipuite thawhhona a pawimawh em em a, tu te mah ralbang bik thei kan ni lo, a ti a. MFA President Pu Lal Thanzara pawhin Mizoram mipuite nghahhlelh tak I-League match khelh a ni tur hi lawmawm a tih thu leh a hlawhtlinna tura tha leh sum tam tak seng tute fakawm a tih thu a sawi bawk.
I-League match-ah hian security ngaih pawimawh a ni dawn a. Players te himna tiderthawng thei ang chi reng reng a awm lohna turin venhimna khauh taka kenkawh a ni dawn a ni. Mipui zingah inkhelh laia mawi lo taka khawsa a, khelmuala tlanluh tumte, players vawm te an lo awm palh a nih chuan hremna na tak, sum tam tak chawi tir leh match thleng thei tawh lo tur hiala hrem theih an nih dawn avangin entu mipuite fimkhur turin meeting chuan a ngen tak meuh a ni.
Rajiv Gandhi Stadium, Mualpui hi international level football thleng thei tur khawpa tha a duan a ni a. Hmarchhak bialah chuan Guwahati leh Aizawl chauh hi hetiang match thleng thei tura stadium nei tha kan ni.
He I-League match hmasa ber ah hian All India Football Federation (AIFF) aiawhin an General Secretary Kushal Das, Vice President Ankur Dutta bakah I-League CEO Sundando Dhar leh official dangte an lokal dawn a. India rama chanchinbu lian tak tak te bakah sports journalist larte an lokal beisei a ni bawk. Match hi live a pek chhuah erawh a ni dawn lova, internet kaltlangin live streaming-a en theih a ni thung ang.
