Minister of State Pu C.Ngunlianchunga’n vawiin khan Chanmari YMA Hall-ah Govt. Zirtiri Residential Science College in a College Week kharna programme Week Closing an buatsaih chu khuallian niin a hmanpui.

Pu C. Ngunlianchunga chuan tunlai khawvel thang chho zelah hun hmang leh vawng thiam apiangte chu mi hlawhtling an ni tiin zirlai naupangte chu a hun taka thil ti turin, thil tul lova hun khawhral lo turin leh hun hman dan te thliar thiam turin a chah. Mihring tam tak mahni inthunun theih loh vangin an duh lo ram te dai in, an thlen tur an thleng phak lo fo thin a, tiin nun uluk leh fimkhur turin leh thil thalo lakah fihlim turin zirlai naupangte a fuih bawk a ni.

Minister chuan beidawnna hi thil hlauhawm tak a ni, tiin zirlai naupangte chu an zirlai lama duh anga an lo ti tha lo anih pawhin beidawng lova, beiseina nen bul tan zel turin a hrilh a, beidawnna avanga mi thenkhat ten an mahni nun tichhiain an mahni te pawh an intihlum thin hi a pawi em a chuvangin nun a hlut zia hi hre reng turin zirlai te a chah. Mi hmantlak leh chhawrtlak tan hna a vang lo nia a rin thusawiin ram leh hnam tan innghahnatlak nia mi tangkai ni theuh turin zirlai te a chah bawk a ni.

Rinawmna hi kohhran nunah chauh ni lovin kan nitin nun leh kan hnathawhna theuh a lang tur a ni ti a. Rinawmna, taimakna leh tawrhchhelna nen zir lai te buaipui a, midangte tan mi tha, mi dik leh mi rinawm ni turin a fuih a ni.

College Week kharna programme ah hian Principal Pu Laltanpuia pawhin thusawiin Sawrkar atanga College hmun hma sakna leh tih changtlunna atana tanpuina an dawn te a tarlang a ni.

Govt. Zirtiri Residential Science College permanent campus hi Durtlang a sak mek a ni a, hun reilo te ah a sak hna hi zawh beisei a ni a, Mipa leh hmeichhia tana Hostel sak pawh zawhfel tawh niin hun reilo te a hawn beisei a ni. College ah hian zirlai naupang 640 vel leh zirtirtu leh thawktu dang 70 vel an awm mek a ni.