Vawiin chawhma dar 10:00 khan I & PR Auditorium-ah Pu T. Sangkunga, MLA, Chairman Mizoram Youth Commission chuan Kabod Computer Training Institute hnuaia zirchhuakte hnenah certificate a hlan.

Khuallian Pu T. Sangkunga chuan Mizo thalaite eizawnna neih theih nana mi thahnem tak Mizoram Youth Commission kaltlanga an lo chherchhuah tawh thu sawiin tunah hian Mizoram pawn khawpui hrang hrang leh foreign ah te eizawnna tha tak neia mi engemaw zat an in zar pharh tawh thu a sawi a. Mi thahnem takin training neiin zirchhuak mahse hlawhtlinna tak tak neitute erawh chu mi taima, tuarchhel leh dawhthei te an nih avangin chutianga awm thei tur chuan a chah a. Mizo thalaite thiamna tak tak nei turin hma an lakpui dan Pu T. Sangkunga chuan sawiin hemi kawngah Ministry of Labour leh Mizoram sorkar pawhin nasa taka hma an lak dan leh an tanpui dan a sawi bawk a. Hna a vang tawh a, chuvang chuan thiamna tha nei turin training laiin tih tak zeta zir a ngaiin foreign lam thlenga kawng a in hawn tawh avangin passport te pawh lo neih lawk a tha a ni tiin Mizoram chhung chauh nilovin ram pawh lam thleng tin zawn a ngaih tawh thu a sawi. Zirchhuakte hnenah khuallian hian certificate a sem nghal a ni.

Pu Lalduhawma, Managing Director, Kabod Computer Training Institute chuan he programme hi kaihruaiin an training institute kalphungte a saawifiah a. Pu Arnab Chakraborti, CEO, AASTHA Foundation leh Pu Jimmy Lalremsanga, managing Director, D&D IT Academy pawhin thusawina hun an hmang bawk a ni.