Vawiin khan DM&R Minister Pu C.Ngunlianchunga chuan Lawngtlai District Hospital-a NEDP sum hmanga hmanraw hrang hrang an neih tharte a tlangzarh.
District Medical Superintendent Office Chamber-a tlangzarh inkhawm buatsaihah Pu C.Ngunlianchunga chuan sawrkar hna thawkte’n chanvo pawimawh changa thutthleng kan luah hian kan nihna tak a lang chiang thin a ni tiin, tun hnaia Lawngtlai District Hospital-in hmasawnna tam tak a neih chu DMS leh doctor-te, nurse leh thawktu dangte inpekna rah a ni, a ti a; lawmawm a tih thu a sawi. Mizoram sawrkarin NEDP kal tlangin ram hmasawnna tur thil hrang hrang a duang a, Lawngtlai District Hospital ngei pawh a chhawrtu hmasa an ni chu lawmawm a tih thu sawiin, khawpui leh hmunpui zawka awm ang khawl tha tak tak District Hospital-in a neih thar chu hriselna kawnga district dawm kangtu a nih tur thu a sawi a. Aizawl Civil Hospital chu Lawngtlaiah sawn a ni ta ang hiala ngaih theih a nih thu a sawi. Minister chuan Lawngtlai District chu kawng erng kimah a hnu fual a ni thin a, sawrkar hna thawkte’n anmahni tih theihna zawn theuhvah theih tawp an chhuah loh chuan hmasawnna hmel hmuh tur a awm dawn lo a ni tiin, sawrkar hna thawkte chu theih tawp chhuaha district hma sawn nana hna thawk turin a chah nghal bawk.
He hun hi Lawngtlai District Medical Superintendent Dr Lalmalsawmi Hmar chuan kaihruaiin, tun hnaia District Hospital-in hma sawnna hrang hrang an neihte leh an la mamawh thil thenkhat te sawiin, DONER hnuai atanga hospital building sak mek a nih thu leh rei lo teah Trauma Centre pawh sak a nih tur thu te, hospital fai intihsiakna Kayakalp-a an tel vanga District Hospital-in hmasawnna tam tak a neih thu leh doctor tha tak tak 10 lai an neih avanga sawrkar laka an lawm thu te a sawi bakah, nurse 8 chauh an neih avanga an indaih loh thu leh ambulance tha an la mamawh thu te a sawi a. Medical Officer Dr Lalmalsawma chuan NEDP atanga an dawn hmanruate chu PowerPoint Presentation hmanga hrilh fiahin, Dr Lalduhawma (Gyneacologist) chuan lawm thu sawina hun a hmang bawk.
Lawngtlai District Hospital-in NEDP sum hmanga hmanrua an neih thar hi hmanraw chi hrang hrang 36 niin, khawl langsar zualte chu horizontal sterilizer, endoscopy machine, ultrasound machine, colposcope, egg recorder, defibrillator, fogging machine, wheelchair leh weighing machine te an ni a, khawl neih thar zawng zawng hi a vaiin Rs nuai sawmsarih pathum singriat sangnga leh sawmruk paruk (Rs 73,85,066/-) man a ni.
Minister chuan he’ng an hmanraw tharte hi enpuiin, damdawi in a fang kual nghal a. Minister hi LADC-a EM Pu C.Lalneihkhuma leh LaiDCC hruaitu eng emaw zatin an tawiawm a. He hunah hian Lawngtlaia sawrkar official thenkhat te, tlawmngai pawl thenkhat ai awhte leh damdawi ina thawktu pawimawh zualte an tel a ni.
