Vawiin chawhnu Khan Central YMA Hall, Tuikhuahtlang-ah Home Minister Pu R. Lalzirliana chuan Central YMA President Pu Vanlalruata hnenah ruihhlo dona atan leh tul anga hman turin Cheng nuaih Riat (8) a hlan a. Yma branch hrang hrang hnenah pawisa hi sem nghal a ni.

Khuallian Pu R. Lalzirliana chuan inhmuhkhawmna hun tha neih a ni chu lawmawm tiin home department, excise department leh YMA ten thawhhona thuthlung ziah tawh chu an kengkawh reng a ni, a ti a. YMA tellovin Mizo nih hi a kim lova, YMA chu tun hma atanga Mizo nun tikimtu leh kan hnam nun mawi tak vawiin ni thlenga chawikangtu, ram leh hnam humhalhna kawnga mite tana huat pawh hlau lova ram tana inpe awmkhawmna a ni, a ti a. Kan Zoram dinhmun enin kan mipate an boral nasat bakah hmeithai an tam phah a, YMA nihna hi lek kawh lehzual a ngai tih kan inhriatchhuah thar a ngai a ni, a ti a. Kan pipute khan phut let nei lovin khawtlanga tanpui ngai leh rethei zawkte an khaichhuak thin a ni tiin chutiang ang hnam nun, thian chhan thih ngam mi huaisen hnam kan nihna chu kawng hrang hrangah a la lang chhuak zel a ni, a ti a. Tun hma angin lan chhuahna kawng tam loh hmel mahse chhiatni thatni ah te hian YMA chuan kan hnam ze mawi tak an lanchhuah tir reng a ni, a ti a. YMA chuan ruihhlo dona kawngah theihtawp an lo chhuah thin thu sawiin chhungkaw mangangte tanpuiin a tul angin hma an lo la tawh thin thu a sawi a. Thangtharte tana entawntlaka YMA in hna an thawk chu chhuanawm a tih thu a sawi a. Kan hnam tan chuan ruihhlo do kawngah thahnemngai taka tan lak a ngaih thu a tarlang a. Police, Judicial Magistrate leh mipui inkar tha neih a pawimawh thu sawiin hei hian ruihhlo do kawngah pawh thui tak a pui dawn a ni, a ti bawk. Krismas leh kumthar vuakveta halpuah hal khap chungchangah pawh YMA member kalkhawmte hnenah chuan mahni veng theuhah theihtawp kan chhuah a ngai a ni tiin a fuih bawk.

Programme hi Central YMA President Pu Vanlalruata chuan a kaihruai a. Central YMA Asst. Secretary Pu Peter Chhakchhuak atangin report ngaihthlak a ni a. Vice President Pu R. Lalngheta chuan thusawina hun a nei bawk a. YMA branch 84 atangin memberte an kalkhawm bakah police hotute an tel bawk a. YMA Sub-headquarters Champhai, Serchhip, Mamit leh Kolasib hnenah Cheng 40,000 hlan niin Lunglei Sub-headquarters hnenah Cheng 50,000 hlan a ni a. Hei bakah hian Branch hrang hrang hnenah sem a ni bawk a ni.