Vawiin khan Lawngtlai DC Conference Hall-ah Deputy Commissioner’s Online leh Health Worker Monitoring Systyem (HWMS) chu DM&R Minister Pu C. Ngunlianchunga’n a hawng.
Pu C. Ngunlianchunga chuan DC online chu mipuiin sawrkar hna thawh dana an duh khawp loh leh mamawh an neihte an thlen theihna leh department hrang hrangin rang taka mipuite harsatna an chin fel theihna tur hmanraw tangkai tak tur a ni tih sawiin, district mipui leh department tin te’n a nih tur ang taka an hman tangkai a duh thu a sawi a. Sawrkar hna thawkte chu mipuite tana thawk an ni tih inhria a, dawr nuam leh rilru zau tak pu mi ni turin a chah a. Hriselna kawnga mipui nena inngheng hnai ber an nih avangin health worker-te chuan ram leh khawtlang hrisel nan an hna tha taka an thawh a tul thu sawiin, mi rinawm tam tak an awm laiin hna thawk ven leh vil tlat ngai an awm thin avangin health worker te hna thawh vil theihna hmanraw tha tak neih a pawimawh a, vawiina hawn tak HWMS chuan hriselna kawnga district hmasawnna a ken tel a rin thu a sawi.
DC online leh HWMS hawnna hun hi Election Officer Pu Lalrinawma MCS chuan kaihruaiin, Digital India hma lakna peng hrang hrangte chu Lawngtlai District-ah pawh kalpui ve zel tum a nih thu a sawi a. DC online leh HWMS buaipuitu Mizoram State eGovernance Society (MSeGS)-a Network Engineer Pu Huapliana chuan website leh system hman dan tur a sawi fiah a. SDO (Sadar) Pi Rochuangkimi Khawnglawt chuan lawm thu sawiin, hun khar a ni.
DC online kal tlang hian mipuite department hrang hrang laka lungawi lohna emaw mamawh an neihte emaw an thlen thei dawn a. DC office chuan hei hi lo dawngin, department-ah an thawn chhawng ang a. Chu chu department-in an lo ching fel thuai thin dawn a ni. HWMS hmang hian health worker-te’n an bial an fan dan leh nu nau pai an tlawh dan te chu system-ah an report thin ang a, hemi hmang hian an hna an thawk ngei em tih a lo hriat theih dawn a, health worker hna thawk tha lo an awm paw’n awlsam takin a hriat zung zung theih dawn a ni.
Vawiina DC online leh HWMS hawnna hunah hian LADC-a Executive Member Pu C. Lalneihkhuma leh sawrkar official hrang hrang bakah, LaiDCC hruaitute an tel.
