Vawiin khan Lawngtlai Horticulture Division leh Lawngtlai Florists Association te tang kawp buatsaih Horticulture Exhibition 2018 chu LADC Conference Hall-ah AH & Vety Minister Pu C. Ngunlianchunga'n a hawng.

Pu C. Ngunlianchunga chuan kan ram leilung hi eizawnna tlaka tha ni mah se, hna kan thawh tlem avang leh tih tak takna kan neih loh thin avangin ram leilung thatna hi kan la hausakpui tam lo hle a ni, a ti a. Thlantui far lova hausak kan tum avangin kan ram leilung hausakna hi kan dah tawl mai mai a ni tiin, kan hnam leh kan chhungkua a zahawm a, mi ngaihsan nih kan duh chuan kan thawhrim a ngai a, hna thawk tha chu a rah hmuh theihin a awm thin a ni, a ti.

He Horticulture Exhibition hawnna hun hi Divisional Horticulture Officer Pu L. Lalhmingmawia Pachuau chuan kaihruaiin, kal khawmte lawmna thu a sawi a. Lawngtlai Florists Association (LFA) President Pi Zodinpuii Fanchun leh Lunglei District Flower Growers Association (LDFGA) President Pi  C. Lalthankhumi te'n thu sawina hun hmangin, zaithiam zai ngaihthlak a ni a. Horticulture Development Officer Pu Hunlawmawma chuan lawm thu sawiin hun a khar a ni.

Tun hi Lawngtlai Horticulture Division te'n Exhibition an buatsaih vawi hnihna a ni a. Nikum 2017 khan hlawhtling takin Exhibition hi an lo buatsaih tawh a ni. Tun tumah hian pangpar chi hrang hrang leh thlai rah chi hrang hrang item 35 pho chhuah a ni a, lawmman siam vek niin, February ni 16, 2018 khian Exhibition kharnaah lawmmante hi sem a ni ang.